Andrei II (Russies: Андрей Ярославич; c. 1222–1264) was die derde seun van Jaroslaf II. Hy het sy oom Swjatoslaf III in 1249 opgevolg as grootprins van Wladimir-Soezdal. Hy het die Mongole drie jaar later uitgedaag en is deur hulle uit Rusland verdryf, waarna hy na Swede gevlug het.
In 1256 het Andrei na die stad Sarai gereis om verskoning te vra vir sy ontrouheid. Toe hy na Rusland terugkeer, het sy broer Aleksander Nefski vir hom die oostelike deel van Rusland gegee, onder andere Nizjni Nowgorod en Gorodets aan die Wolga. Toe Aleksander in 1263 dood is, wou Andrei Wladimir by sy grond voeg, maar sy planne is deur sy jonger broer Jaroslaf III van Twer in die wiele gery.
