Vals Im Bashir
Vals Im Bashir ye una película d'animación de calter documental, dirixida y escrita por Ari Folman y estrenada'l 5 de xunu de 2008 n'Israel. Esi mesmu añu ganó'l Globu d'oru a la meyor película en llingua non inglesa y el Cesar a la meyor película estranxera. Tamién foi nomada al Óscar a la meyor película de fala non inglesa.
Argumentu
[editar | editar la fonte]Nel añu 1982, Ari Folman foi con 19 años soldáu d'infantería de les Fuercies de Defensa d'Israel. En 2006 al aconcéyase con un collaciu que fizo'l serviciu militar naquella dómina esti cuenta-y que sufre velees que cree que tienen que ver con daqué socedío na Guerra'l Líbanu. Folman, que tamién participara nesa guerra, sorprendióse por nun ser quién a recordar daqué d'aquella esperiencia vivida nel país vecín; depués d'esi alderique, aina, entama a llega-y a los sos pensamientos una imaxe sobre la nueche de la masacre de Sabra y Chatila magar que tien duldes de que seyan ciertes.
Esa semeya, pali que pali, entama a ruca-y la tiesta ca vuelta con más frecuencia nun siendo capaz de atopa-y significáu a lo que ve. Nella apaez elli y los sos collacios de la xunidá d'infantería bañándose na oriella del mar en Beirut, mientres caen bengales seliquinamente allumando la nueche escura y dexando a la vista los edificios frayaos pola guerra que taben averaos al sable.
Folman vuelve entós a aconceyase col so collaciu quien-y encamienta qu'investigue lo que pasó falando con más compañeros pa intentar recuperar asina la memoria de los fechos que ocurrieron.
Repartu
[editar | editar la fonte]1) Ari Folman. Como elli mesmu; ye un cineasta israelín que va poco finó'l so serviciu militar de reserva. Unos venti años p'atrás tuvo nes Fuercies de Defensa d'Israel durante la Guerra'l Líbanu de 1982.
2) Miki Leon como Booz Rein-Buskila, un veteranu de la Guerra'l Líbanu de 1982 que padez velees.
3) Zahava Salomon como ella mesma, una israelina psicóloga y investigadora en campu de los traumes psicolóxicos.
4) Harazi como elli mesmu, un veteranu israelín de la Guerra'l Líbanu de 1982. Nel tiempu la guerra, dirixó una brigada de tanques asitiaos fuera del campamentu de refuxaos de Chatila
Títulu
[editar | editar la fonte]La película garra'l nome d'una escena de la mesma na que Shmuel Frenkel, el comandante de la xunidá d'infantería, garra una ametralladora MAG y bailla disparando escontra francotiraores que los habíen arrodiáu nuna cai atarraquitada con cartelos de Bashir Gemayel.
Crítica
[editar | editar la fonte]La película recibió comentarios per bonos por parte de los críticos de cine y el periódicu The Guardian calificóla como una película estraordinaria, desgarraora y provocaora.
Producción
[editar | editar la fonte]La película tardó cuatro años n'acabase. El film amesta la música clásica con música de los años 80 y gráficos realistes con escenes surrealistes amás de contar con ilustraciones similares a les historietes. L'únicu cachu de película que nun se fizo per aciu de l'animación ye un pequeñu segmentu cortu al final de la cinta qu'amuesa imaxenes reales y orixinales de la matanza de Sabra y Chatila.
Referencies
[editar | editar la fonte]- ↑ URL de la referencia: http://www.kinokalender.com/film6801_waltz-with-bashir.html. Data de consulta: 2 avientu 2017.
- ↑ Afirmao en: filmportal.de.
- ↑ 3,0 3,1 3,2 3,3 3,4 3,5 3,6 3,7 3,8 URL de la referencia: https://www.europeanfilmacademy.org/2008.106.0.html. Direición web d'archivu: https://web.archive.org/web/20190604175723/https://www.europeanfilmacademy.org/2008.106.0.html. Data de consulta: 1r xineru 2020.
- ↑ URL de la referencia: https://www.europeanfilmacademy.org/European-Film-Awards-Winners-2008.65.0.html. Direición web d'archivu: https://web.archive.org/web/20190718190708/https://www.europeanfilmacademy.org/European-Film-Awards-Winners-2008.65.0.html. Data de consulta: 1r xineru 2020.
- ↑ URL de la referencia: https://www.cnc.fr/professionnels/visas-et-classification/120749.
