Giorgio Napolitano
Giorgio NAPOLITANO [ĝorĝo napolita:no] (naskiĝis la 29-an de junio 1925 en Napolo - la 22-an de septembro 2023, en Romo) estis itala politikisto kaj Prezidento de la Itala Respubliko. Li estis la ununura kiu estis elektita por du oficperiodoj kiel prezidento.
Li estis elektita deputito unuafoje en 1953 en la sino de la tiama Itala Komunista Partio kaj estis plurfoje reelektita.
Inter 1969 kaj 1975, li okupiĝis ĉefe pri la kulturaj aferoj en la partio. Lia libro Intervista sul PCI ("Intervjuo pri la PCI") kun Eric Hobsbawm (1975) estis granda sukceso, kaj estis publikigita en pli ol 10 landoj.
De 1989 ĝis 1992 li estis deputito en la Eŭropa Parlamento, kaj poste estis prezidanto de la Ĉambro de Deputitaro de Italio. En 1996, Napolitano estis ministro de Internaj Aferoj en la registaro de Romano Prodi. Poste li estis denove parlamentano, en la nun nomata Partio de la Maldekstraj Demokratoj. La 23-an de septembro 2005 li estis nomumita dumviva senatano.
Li estis elektita kiel la 11-a Prezidento de la Respubliko la 10-an de majo 2006, kaj prenis oficon la 15-an de majo. En 2013, pro la persisto de la Demokrata Partio, de la Popolo de Libereco kaj de Civitana Elekto, li estis reelektita por nova oficperiodo. Tio estas la unua okazo en la itala respublika historio.