Kaukaso (mendikatea)

Kaukaso (mendikatea)
Kaukaso (mendikatea)
Datu orokorrak
Mendirik altuena	Elbrus
Garaiera	5.642 m
Mota	mendikate
Luzera	1.200 km
Zabalera	160 km
Azalera	477.165 km²
Geografia
Koordenatuak	42°30′N 45°00′E / 42.5°N 45°E
Honen parte da	Alpetar gerrikoa

Kaukaso^[1] Eurasiako mendi sistema da, Asiaren eta Europaren artean kokatua, Kaspiar itsasoaren eta Itsaso Beltzaren artean ipar-mendebaldetik hego-ekialderantz 1.200 kilometroz luzatzen dena.

Geografia

Kaukaso Europa edo Asiakoa den eztabaidan dago. Geologikoki, Eurasiaren erdian dago. Historikoki, greziarrentzat Bosforo itsasartea eta Kaukaso ziren Europaren mugak. Erdi Aroan, berriz, Bosforon eta Don ibaian kokatu zituzten. Philip Johan von Strahlenbergek 1730ean Errusiarako egindako ikerketan mendikatea Asian kokatu zuen. Politikoki, Europa eta Asiaren arteko muga, Europako Errusia eta Georgia eta Asiako Armenia eta Azerbaijanen artekoa da, zehatzago, Kura eta Kvirila ibaiek eratzen dutena.

Kaukaso sistema bi zatitan banaturik dago:

Kaukaso Handia. 1.200 kilometroko mendikate zuzena da, Itsaso Beltzaren ipar-ekialdeko bazterrean dagoen Sotxi hiritik Kaspiar itsasoaren kostaldean dagoen Bakuraino luzatzen dena.
Kaukaso Txikia. 1.125 kilometroko mendikatea da, aurrekoaren paraleloa, 100 kilometro hegoalderago kokatua. Bien arteak Likhi mendikatea dago, Kolkida sakonunetik Kura sakonunera doana.

Gailur gehienak 2.000 metrotik gorakoak dira, eta Elbrus da garaiena (5.642 metro). Dykhtau (5.203 metro), Xkhara (5.201 metro) eta Kazbek (5.047 metro) dira beste gailur nagusiak. Kaukaso Handiak 2.000 inguru glaziar ditu. Ibai nagusiak Rioni, Kura eta Aragvi dira. Mendi maldak basoz estaliak daude.

Mendirik garaienak

Hona hemen Kaukasoko mendirik altuenak.

Izena	Altuera (m)	Gailurra (m)	Herrialdea
Elbrus	5.642	4.741	Errusia
Dykhtau	5.205	2.002	Errusia
Xkhara	5.201	1.365	Georgia/Errusia
Koshtan Tau	5.152	822	Errusia
Janga	5.059	300	Errusia/Georgia
Kazbek	5.047	2,353	Georgia/Errusia
Pushkinn	5.033	110	Errusia/Georgia
Katyn Tau	4.979	240	Errusia/Georgia
Xota Rustaveli gailurra	4.860	50	Georgia/Errusia
Tetnuld	4.858	672	Georgia

Ekonomia

Aberastasun iturriak, ibaietako elektrizitate indarraz gainera, zura, ehiza eta meatzeak (burdina, ikatza, beruna, zinka, kobrea, molibdenoa eta manganesoa) dira.

Erreferentziak

Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2017/11/15 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.