Maritxu Egiguren

Maritxu Egiguren
	Maritxu Egiguren erraketista
Bizitza
Jaiotza	Zaldibar, 1921eko abuztuaren 14a
Herrialdea	Bizkaia, Euskal Herria
Heriotza	Bartzelona, 1981eko azaroaren 21a (60 urte)
Hezkuntza
Hizkuntzak	euskara; gaztelania
Jarduerak
Jarduerak	erraketista

Maria Asunción “Maritxu” Egiguren Gallastegi (Zaldibar, Bizkaia, 1921eko abuztuaren 14a - Bartzelona, 1981eko azaroaren 21a) erraketista profesionala izan zen, kantxetan Marichu izenarekin aritutako aurrelaria.^[1]

Biografia

Jainaga Garaikoa baserrian jaioa, gaztetan hasi zen erraketa jokoan trebatzen. Aitari laguntzen egunero joaten zen Eibarrera etxeko behien esnea bezeroen artean partitzera eta zereginok amaituta denboratxo bat eskaintzen zion erraketan jokatzeari. Gustuko jardun hori luzatze asmoz, isilean, ordu bete atzeratzen zion erlojua aitari.^[1]

Jainaga Garaikoa baserria, bere jaiotetxea.

Bartzelonara kontratuarekin joateko eskaintza etorri zitzaionean, ez zuen ezetzik esan. Neska taldetxo bat joan zen eta elkarrekin bizi izan ziren. Gose handia pasatzen zutela gogoratzen zuen berak: gerra ostea, errazionamendu sasoi betea… Ameriketara jokatzera joan ziren bere inguruko lagun batzuk, bera ez ordea.

Bartzelona, Sabadell eta Logroñoko frontoietan jokatu zuen aurrelari postuan.^[1] 09 1946an Salvador Vidalekin ezkondu ostean ere jokatzen jarraitu zuen. Elkarrekin joaten ziren frontoira; berari lasaitasuna ematen zion senarra han egoteak, babestuta sentitzen zela esaten zuen. Beldur apur bat bazen erraketista batzuen artean: gazte oraindik, bakarrik, familiarengandik urrun... Gainera sarritan entzun behar izaten zuten denak elkarrekin bizi baziren, lagun artekoena baino afektuosoagoa izango zela euren hartu-emana eta horrelakoak. Esamesak beti mingarri.

Maritxu Egiguren eta Jesusa Garitaonandiaren omenezkoa Zaldibarko Olazar pilotalekuan.

Erraketista profesionalek, soldataz gain, kinielen mugimenduarekin ateratzen zuten diru estra jasotzen zuten. Harmailetako jokalari gehiena gizonezkoa izaten zen, baina andrazkoak ere baziren ikusleen artean. Maritxuk behin apustulari batekin arazo latza izan zuen: partidua salduta zuela eta tongoa egiten ari zela uste zuelarik, oihuka hasi zitzaion, “Putakume!” diharka. Oso jenio bizikoa zen eta hori entzun zuenean, kantxatik irten, topatu publikoan ikuslea eta bere amari holakorik esatea onartzen ez zuela esanez, amorruaren amorruaz erraketarekin buruan jo zuen. Salaketa jarri zion erasotuak eta ondorengo epaiketa irabazi egin zuen zaldibartarrak.

Aintzatespenak

Zaldibarko Olazar udal pilotalekuan, Maritxu Egigurenen eta Jesusa Garitaonandiaren koadro bana daude hormetako baten jarrita, bi erraketiston argazkiarekin.

Erreferentziak

↑ ^a ^b ^c Lasuen Solozabal, Balendin. Antzinako argazkiak. Zaldibar (VII). Balendin Lasuen Solozabal, 4 or..

Kanpo estekak

Datuak: Q126269754

[:0-1] Lasuen Solozabal, Balendin. Antzinako argazkiak. Zaldibar (VII). Balendin Lasuen Solozabal, 4 or..

[1]