Rubén Castro

Rubén Castro

(2012)
Biografía
Nacemento	27 de xuño de 1981 (43 anos) As Palmas de Gran Canaria, España
Altura	174 cm
Peso	72 kg
Actividade
Ocupación	futbolista
Período de actividade	2000 -
Deporte	fútbol
Posición de xogo	Dianteiro
Traxectoria   Equipo 2000–2001   UD Las Palmas Atlético 34 (13) 2001–2004   UD Las Palmas 112 (36) 2004–2005 → cesión:    Albacete Balompié 22 (3) 2004–2010   Deportivo da Coruña 31 (4) 2006–2006 → cesión:    Racing de Santander 1 (0) 2007–2007 → cesión:    Gimnàstic de Tarragona 20 (4) 2008–2009 → cesión:  Sociedad Deportiva Huesca 41 (14) 2009–2010 → cesión:    Rayo Vallecano 42 (14) 2010–   Real Betis Balompié   Selección nacional 2002–2003   España sub-21 7 (6)

Rubén Castro Martín, nado nas Palmas de Gran Canaria o 27 de xuño de 1981, é un exfutbolista español, que xogaba de dianteiro. É o futbolista con máis tempadas no fútbol profesional español (23), e o máximo goleador da historia da Segunda División, con 195 goles, un máis que Nino.

Traxectoria

Comezou a xogar ao fútbol no Artesano, antes de ingresar na canteira da UD Las Palmas en idade alevín. Tras progresar polas diferentes categorías inferiores do club, debutou co primeiro equipo na Primeira División o 25 de febreiro de 2001, nun partido ante o Málaga na Rosaleda no que substituíu nos instantes finais a Antonio Guayre. Na seguinte campaña anotou fronte ao Real Madrid os seus dous primeiros goles como profesional. Saltou ao campo do Estadio Insular na segunda parte como substituto de Orlando Suárez, co marcador amosando un empate a dous goles, e deulle a vitoria ao seu equipo con dous tantos, o segundo deles cun espectacular lanzamento dende máis de 35 metros que sorprendeu a Iker Casillas.

Marcou un total de 6 goles nesa tempada e 10 na seguinte, xa co equipo en Segunda División. Na tempada 2003/04 foi o máximo goleador da categoría de prata (22 dianas), pero os seus goles non evitaron o descenso do club da súa cidade natal á Segunda B.

Tralo segundo descenso co Las Palmas, foi contratado polo Deportivo da Coruña, nun acordo polo que tamén chegou á Coruña o centrocampista Momo. O acordo saldou a débeda que a UD Las Palmas contraera co club galego ao contratar ao arxentino Gabriel Schürrer. Na súa primeira campaña como xogador do Deportivo, saíu cedido ao Albacete, tamén en Primeira, co que disputou 22 encontros, anotando 3 goles.

A tempada 2005/06 disputouna co Deportivo, co que xogou un total de 33 partidos e marcou 8 goles, a metade deles na Copa Intertoto.

A comezos da tempada 2006/07, volveu ser cedido, esta vez ao Racing de Santander, pero debido á falta de oportunidades, abandonou o club cántabro antes da apertura do mercado invernal. O seu novo destino foi o Nàstic, onde comezou moi ben, con 3 goles nos seus primeiros 3 partidos, aínda que o club tarraconense descendeu ao final de tempada a Segunda División. Rubén regresou ao Deportivo na tempada 2007/2008, onde a súa participación foi pouco máis que nula.

Na tempada 2008/2009 xogou no SD Huesca, da Segunda División, onde chegou cedido novamente polo Deportivo. Alí foi titular indiscutible e recuperou as súas boas cifras goleadoras, marcando un total de 14 tantos, cifras semellantes ás que obtivo na seguinte campaña, cedido no Rayo Vallecano (44 partidos e 15 goles).

No verán de 2010 fichou polo Real Betis, tamén de Segunda. Na súa primeira campaña no club andaluz marcou 27 goles en liga, sendo o terceiro máximo anotador da categoría, aos que sumou 5 máis na Copa do Rei. Os seus goles foron unha das claves do ascenso do equipo de Pepe Mel á Primeira División. Militou durante os seguintes tres anos na máxima categoría, con altas cifras goleadoras, pero non puido evitar o descenso na 2013/14, na que o equipo só sumou 25 puntos.

Con todo, decidiu continuar no Betis a pesar da perda de categoría, e na seguinte campaña foi de novo o máximo goleador da Segunda División con 32 goles, contribuíndo a que o equipo regresase inmediatamente á máxima categoría. Esa temapda converteuse ademais no máximo goleador da historia do club, superando os 94 tantos de Manuel Domínguez. Xogou dous anos máis no club bético, antes de saír cedido en xullo de 2017 ao Guizhou da Superliga da China. Regresou ao Betis en xaneiro de 2018 e xogou neste uns meses máis ata que o deixou no verán de 2018, despois de 147 goles en 290 partidos.

A continuación regresou á súa illa natal e á UD Las Palmas, club no que xogou durante as seguintes dúas campañas na Segunda División, marcando un total de 30 goles. Entre 2020 e 2022 militou no FC Cartagena, conseguindo números goleadores aínda máis altos (39 goles en 84 encontros).

Finalmente, na tempada 2022/23 fichou polo Málaga. Co equipo andaluz xogou a súa 23ª campaña na Segunda División e conseguiu 10 goles, superando a Nino como o máximo goleador da historia da competición (195 goles).

Persoal

Os seus irmáns Álex e Guillermo foron tamén futbolistas.

Véxase tamén

Ligazóns externas

• Datos do xogador en bdfutbol.com (en castelán)
• Datos do xogador en futbolme.com (en castelán)
• Datos do xogador en transfermarkt.co.uk (en inglés)