SINOM DASAR.

1. Ada jani katuturang

Tutur Ida anak luwih
Jenek maring Siwa pada
Betara Siwa maka nami
Mambek ayat nyobo rabi
Betari Uma ne kapungkur
Ne kecobo olih Ida
Baktin ambek Ida Betari
Sampun niku
Ambek Ida Betara Siwa.
2. Sadurunge cawis titiang
Titiang nunas agung sisip
Maring Ida sasuhunan
Muah isang miring sami
Wireh sekar alit niki
Warnan nyane Hyang Sinuhun
Mogi titiang tan alpaka
Ngundang sekar alit niki
Daging ipun
Iwang patut ampurayang.
 SINOM SEWAGATI.
3. Kocap Ida Betara Siwa
Dipemereman ngeka Bhudi
Mapi-mapi sakit Rahat
Raris matur ring Betari
Pangucape sarat tuwi
Mapi noro dadi bangun
Duh adi Betari Uma
Tulung dewek Beli adi
Beli lacur
Nadak Beli sakit keras.
4. Betari Uma rarsi nguca
Noli Ida matur bakti
Singgih Ratu naweg pisan
Apa anggon mangubadin
Wireh titiang noro uning
Apang tuara salah laku
Dening titiang mawak muda
Titiang takut nemu sisip
Sampun niku
Kocap Ida Betari Uma.
 MASKUMAMBANG.
5. Duh sang Ayu Betari Uma Arin Beli
Ojo walang manah
Pada tuhu satya bakti
Lawan Beli mehangkepan.

6. Sane mangkin kemu sampun luas Adi

Dusrus Kesekala
Ngalih lembu warna putih
Hampehane nuruh kemu.

7. Singgih Ratu aksi titiang matur bakti

Bahan idep Satya
Cutet titiang nunas pamit
Betara Siwa raris ngucap.
8. Sadurunge mangkin Adi ninggal Beli
Maring lemah pada
Beli mangkin mapet munyi
Sat-sat bekel adi luwas.

9. Pade during Adi polih tamban Beli

Rikang lemah pada
Eda Adi madek Beli
Basen Bali ne resepang.

10.Kapindone papet Beli maring Adi

Ojo nyasar cita
Sampunika paapet Beli
Durus adi ne lumampah.
 PUPUH DURMA.
11.Singgih Ratu durus aksi sembah titiang
Titiang nunas pamit jani
Wuwus Ida matur sembah
Raris Ida ne lumampah
Mabur lampah Ida Betari
Ring umbara,
Ngelawat genah I Lempu Putih.
12.Ngantos lesu lampah Ida mangulayang
Ngawas genah I Lembu Putih
Masih during kacubdukang
Malih Ida ngundag lampah
Mider-ider maring langit
Kancitana
Katon Ida Wana Sripit.

13.Jani warna Betara Siwa di Pemereman

Sedek Ida ngeka budi
Suban puput ngeka naya
Raris turun ke sekala
Ayat nyobo ambek I Ratu
Maring alas
Lembu Krena kalinggihin.
14.Gelis rawuh lapmah Ida di Sekala
Maring tengah warna Sripi
Raris Ida nyuti rupa
Nyuti dadi rare angon
Mungguwing Srana Ida laki
Lembu Kresna,
Kewastu luh warna putih.
 PUPUH GINADA DASAR.
15.Kocap malih Betari Uma
Kari Ida maring langit
Dumarane ngaton alas
Raris Ida Betari turun
Suba nampaek maring lemah
Pukul kalih,
Rikang tengah alas ramia.
16.Raris Ida nyusup warna
Ngalih genah I Lembu Putih
Noro ngitung madur gama
Tegeh lebah asih tuhut
Kocap dauh pukul tiga
Ida Betari,
Kancit nemu rare angon.
 GINADA BAGUS SEMARA.
17.Atian pisan kayun Ida
Nemu anak ngangon sampi
Bahan sampin nyane Petak
Raris Ida nyawis matur
Jero Lanang naweg pisan
Kaping singgih,
Titiang nyelag matur tanya.
18.Jero lanang uli dije
Dadi purun tanpa kanti
Ade maring tengah alas
Ngangon sampi Putih tulus
Keto Jero tanyan titiang
Pade pelih,
Titiang nunas iwang nata.
 PUPUH PANGKUR.
19.Pengangone lagas ngucap
Inggih Jero anak istri Titiang yukti
Pecak saking Desa utuh
Muwah kadi sampin titiang
Yan tan pedas iku seranan titian hidup
Yan bina kadi titiang
Sat-sat jiwan titiang maurip.
20.Cutet suba ujang titiang
Kalih kadi Jero Istri maka yuti
Uli dija witne tuhu
Dadi purun andirian
Mawak wadon ada maring alas gunung
Yuktin Jero pacang kija
Betari Uma manyawurin.
 GINADA DASAR.
21.Inggih jero mawak angon
Titian sadia mangaturin
Apang jero Lanang wikan
Ring panangkan titiang tuhu
Titiang saking Indra Loka
Tanpa kanti,
Turun maring jagat pada.
22.Krana titiang purun ngalas
Mawak wadon tanpa kanti
Wireh saking ada buat
Ngalih Lembu Putih mulus
Sedeng luwung lampah titiang
Jero laki,
Kecunduk ngangon lembu Petak.

23.Gelis jani atur titiang

Risang alas Lembu niki
Dong olasin kuda titiang
I Mawak wadu nunas susu
Antuk perak masesocan
Yadin kedik,
Jero ngicen titiang nanggap.
 GINADA BAGUS SEMARA.
24.Nual malih I Pengangin
Inggih jero anak Istri
Ampurayang basan titiang
Titiang noro ngadol susu
Anggen napi mas punika
Miwah pipis,
Wireh titiang wong di alas.
25.Masuar Ida Betari uma
Nunas ice ngasih-asih
Inggih Jero mawak angon
Dong picain titiang malu
Yadin kidik icen Jero
Titiang nampi,
Luyan titiang nunas jiwa.

26.Pade jero tan madolan

Icen titiang nunas akidik
Pacang anggon titiang ubad
Susun Lembu Jero punike
Titiang saking sarat pisan
Kadi mangkin,
Lawan Jero Anak Lanang.
27.Jero Istri ampurayang
Cutet titiang tan ngaturin
Sadurunge Jero ledang
Ngicen titiang legan kayun
Wireh kadi sampin titiang
Sarat urip,
Hidup titiang maring lemah.

28.Betari Uma dahat merang miragiang

Tursumaha ida manuding
Ih ibo ban ngucap
Apang noro salah sengguh
Kaden Niro Istri jalir
Ngalas-alas
Sarat ngalih anak laki.
29.Yening ibo noro pedas lawan Noro
Make yuktin Niro Betari
Rabin Ida Betari Siwa
Kasub maring Siwa Loko
Kalih ibo yan tan uning
Niro ngaran
Ida Betari Giri Putri.

30.Sang pengangon raris nual sado bangras

Yadin Jero Ratun Betari
Kadi noro pacang nyembah
Napi malih nungken titiang
Sayan-sayan idep kai
Mikukuhang.
Ampehan sampin kaine niki.
31.Dening manut kadi basan kai busan
Duen kai dahat pingit
Ale Ayu belo gelah
Yastun kai keni duke
Masih kecampahin kai
Reh di lemah,
Lembun kai dogen Putih.

32.Sampun nika dasar kaine mingittang

Lembun kai ne puniki
Yastun Betari menyaratang
Watak Gamang tulak gelah
Keto yuktin ambek kai
Dahat satya
Mingitan dua-an diri.
33.Malih ipun Lembun kai satuya pisan
Lawan kai ne maurip
Yadin ipun mawak buron
Nanging idepne utama
Loyo idep wong utami
Ngelah ambek
Paras-paros saling tindih.

34.Maka cutet basan kai lawan Jero

Yening Jero salit arti
Margi sampun ne pasahang
Nanging pineh basan gelah
Pet Jero ne nagingin
Pe buat gelah,
Sarat Jero jangin kai.
 PUPUH SINOM SEWAGATI
35.Sagt nahang Betari Uma
Sambal Ida nyisik budi
Noli inget ring ubaya
Betara Siwa maseletin
Pade durung mengelihin
Tan kalugra insan mantuk
Kancit kabeh kayun ida
Midep adang mapi kolih
Raris ditu,
Ida mangaturang raga
36.Suban puput saling rasa
Risang anak ngangon sampi
Raris Ida nampi ampehan
Pamit Ida tur memargi
Tan ke warna maring margi
Ring Suwarga sampun rawuh
Ngundag madep Betara Siwa
Nuli matur mangubakti
Inggih Ratu,
Cingak Ratu rawuh titiang.