UNICEF
La Fonduro por Pueri dil Unionita Nationi (UNICEF) esas programo dil Unionita Nacioni (UN) kun chefkontoro en New York-urbo, qua provizas humana e developala helpo a pueri e matri en developanta landi.
Ol esas membro dil Developo-Grupo dil Unionita Nacioni.
La Internaciona Urjanta Fonduro por Pueri dil Unionita Nacioni kreesis da la General Asemblo ye 11ma decembro 1946, por provizar urjanta nutrivo e sanesala sorgo a pueri en landi qui devastesis dum la Duesma Mondo-Milito. On generale egardas la polona mediko Ludwik Rajchman kom la fondinto di UNICEF, ed il servis kom olua unesma prezidanto de 1946.
Segun sugesto da Rajchman, la usano Maurice Pate divenis olua unesma exekutiva direktisto, servinte de 1947 til lua morto en 1965. En 1950, la komiso di UNICEF extensesis por traktar la longa-tempa bezoni di pueri e mulieri en developanta landi. En 1953 ol divenis permananta parto dil sistemo dil Unionita Nacioni, e la vorti "internaciona" e "urjanta" eskartesis del nomo dil organizuro, tamen ol retenis la original akronimo, "UNICEF".
UNICEF dependas ye kontributi de guvernerii e privata donaceri; olua revenuo en 2008 esis US$ 3.372.540.239. Guvernerii kontributas du triimi del resursi dil organizuro. Privata grupi e sis milion individui kontributas lo cetera per nacionala komitati. On evaluas ke 92 procento del revenuo di UNICEF distributesas a programo-servi. La programi di UNICEF emfazas developo di komuneso-nivela servi por avancigar la saneso e bonstando di pueri. UNICEF recevis la Nobel-Paco-Premio en 1965.
La laboro da UNICEF esas grandaparte extera, kun stabo en plu kam 190 landi e teritorii. Plu kam 200 landala kontori exekutas la misiono di UNICEF per programi developita kun hosto-guvernerii. Sep regionala kontori provizas teknikala helpo a landala kontori segun bezono.
La Alimento-Fako di UNICEF situesas en København e servas kom la primara distributeyo di esencala kozi quala vacini, antiretrovirala medikamenti por pueri e matri kun HIV, nutriva suplementi, urjanteso-shirmili, familio-riunigo, ed edukala provizaji. 36-membra exekutiva komitato establisas reguli, aprobas programi e surveyas administrala e financala projeti. La exekutiva komitato konsistas ek guverneriala reprezentanti qui elektesas dal Ekonomiala e Sociala Konsilistaro dil Unionita Nacioni, normale por tri-yara periodi.