Jennifer Lawrence can do anythinggggggg (to me) (please)
Favorite films
Recent activity
AllRecent reviews
MorePopular reviews
More-
First Love: The Litter on the Breeze 1997
Comedic take on Wong Kar Wai style movie, with the help of Wong Kar Wai himself, emotional rollercoaster
Translated from by -
Evangelion: 3.0+1.0 Thrice Upon a Time 2021
有關EVA新劇場版，用左十年時間先接受到AAA Wunder都係庵野秀明嘅造物，葛城作為大佐都值得同等甚至更多嘅愛。庵野秀明真係好勁，用一句「再見」就串連哂廿幾年嚟想講嘅野。佢有好多好多野想講，亦都好識得揀要講咩、要點講。EVA的魔咒講緊嘅可能係世間為庵野秀明同新世紀福音戰士中間所畫嘅等號，可能係講緊EVA為動漫界帶嚟嘅「廢物男主角文化」呢一道聖痕，都可能係講緊睇住EVA大嘅一群人係心靈上所受嘅影響。
庵野秀明用TV版向世人展示新世代係絕望嘅拋擲底下如何承受「世界／未來」嘅重量。初號機揸住渚薰嗰一分鐘，客觀事實就係預算問題所引伸嘅偷格，但庵野作為我心目中嘅神，所做嘅係喺預算不足底下用最大膽同大力嘅方式向觀眾呈現佢最想展示嘅「畫面」。庵野要觀眾切身體會到真嗣親手摧毁屬於自己難得而短暫嘅愛與幸福，或者同大家當時坐係螢幕前以為大結局將至電視機或者錄影帶壞左嘅絕望可作類比，係漫長嘅停滯裏頭睇到好唔舒服。其後25、26集每個各色定鏡同獨白倉卒地交代完各位嘅心理描寫，算係補完左真嗣同大家嘅關係。
係各路金銀湧入之後，庵野秀明帶嚟死與新生，四個少年用一曲《卡農》從新以混剪方式交代一次canon，神臺上嘅庵野秀明除係神，亦都係一位詩人。嚟到AIR／真心為你，真嗣再次面臨各種絕望，大人的吻伴隨住嘅係死亡氣息，少年的吻又慘遭分屍，絕望得引嚟絕望之槍嘅真嗣認為要根本性地處理「他者即地獄」呢個命題，抹消「他者」呢個概念係唯一方法。然後全世界嘅心之壁被溶解，變哂橙汁。絕望又懦弱嘅真嗣係最後關頭仍然渴望撇脫他者帶嚟嘅痛苦之時可以感受到愛，來自他者嘅愛，於是大家又番哂嚟。以明日香一句「真噁心」作結，都係庵野秀明對年輕一代軟弱而搖擺不定嘅一種批判。
當然，有絕望嘅世界一定會有希望，庵野於是用一萬年輪迴過後嘅新劇場版話比世界聽少年如果只有希望，世界依然係會毁滅。序同破嘅真嗣相對正面，真里嘅出現亦為Walkman上永續嘅25、26帶嚟27以及更多，仿佛一切都要好起來。破嘅結尾真嗣為左救綾波不顧一切，美里一句「上吧真嗣，不為他人，只為自己」將充滿希望嘅少年推向高峰，結果第三次衝擊照樣發生，空白的十四年後少年係迷惘中意識到自己為世界帶來破壞，希望旋即轉為絕望，Q似乎係要回歸絕望嘅主題。係少年的我眼中，帶住殺神之力嘅AAA Wunder正正係絕望嘅化身，既象徵希望盡頭一切都沒有意義，又提醒住我睇唔到破下回預告中揭示過空白的十四年所發生嘅事此一事實。
咁希望唔得絕望又唔得，年輕人係庵野秀明眼中係咪一文不值呢？我覺得庵野終究都係喜歡年輕人的，從摩耶口中兩次「這就是年輕人的毛病」語氣同前文後理上嘅分別可以得知。係絕望同希望都唔足夠嘅情況下，AAA Wunder上一眾年輕人用艦隻脊骨打造蓋烏斯之槍，象徵生命同智慧結合所產生嘅意志力，始終一個唔再需要EVA嘅世界，都係要靠年輕人經歷過絕望、抱持住希望，用堅強嘅意志力打造出嚟。如此一來庵野又再次成功將新造物AAA Wunder連同作為動力源嘅初號機擺番係所有重點嘅正中心。
值得再提嘅係真嗣部Walkman，一部由源堂交比真嗣嘅Walkman。除左先前講嘅輪迴與新生之外，呢部Walkman所經歷嘅傳承更係貫穿全個故事。作為來自父親嘅信物真嗣一直珍而重之，陪伴佢渡過無數晚上，亦都象徵住佢同父親嘅業將佢同外界分隔開來。直到源堂強逼真嗣傷害明日香，Walkman就被真嗣拋擲到綾波手上。綾波學識左人與人之間嘅連結，於是帶住Walkman捨身拯救真嗣以及大家所在嘅世界，亦都係因為咁，Walkman回到不顧一切要奪回綾波嘅真嗣手中。Q嘅完結以及終前半真嗣意識到黑綾波並唔係同一個綾波，自己所做嘅一切以及帶嚟嘅破壞完全冇意義。Walkman作為連結嘅象徵物再一次被遺棄，亦都再一次陪伴黑綾波體會、學習連結。重複嘅事情不斷發生，庵野用Walkman配合輪迴與新生嘅母題，真嗣最後帶住黑綾波嘅遺志重新與父親連繫。係負宇宙裏面真嗣同源堂嘅火車辯論終於解開所有嘅結，原來源堂習慣獨行但失去愛妻令佢初次感受到孤獨，音樂同耳機係源堂嘅心之壁，一切隔閡都係源堂自身選擇建立。真嗣帶住一萬年嘅絕望、希望、意志，終於將源堂補完，並係雙親嘅支持下打破輪迴，造出不再需要EVA嘅世界。
終嘅後半部係庵野秀明嘅最高之作，以打破四次原嘅方式逐步瓦解EVA的魔咒，基本上由真嗣踏入負宇宙嗰一刻開始，直至螢幕上出現「総監督／庵野秀明」，我的淚水都係冇停過地流。由2012年第一次睇Q以為自己入錯戲院開始一直心存芥蒂嘅位係美里嘅大人之吻冇左，佢一句「路上小心」本係我全劇最愛。然而空白的十四年過後美里真正咁成為大人，為幫真嗣搭上EVA所擋嘅子彈帶上新一層意義，係新「路上小心」之後捨命將蓋烏斯之槍送入負宇宙，展示左為「保護」而唔見自己骨肉嘅「決心」，同源堂嘅「逃避」形成強烈對比。如此一來，十年嘅空洞終於得以補完。
總括而言，係我心目中EVA的魔咒就係「再見」。「再見，所有的福音戰士」、「再見，是為了再次相見的咒語」，庵野秀明已經為呢廿幾年嘅時光畫上最完美嘅休止符。我仍然會繼續期待睇到佢會做埋空白の１４年間，繼續留係呢個全世界最大嘅坑入面，多謝福音戰士、多謝庵野秀明，多謝。
