advent

Mange barn, og nokon vaksne, har julekalender, eller adventskalender. Kalenderen har 24 luker eller pakkar, ein for kvar dag i desember, fram til julaftan. Ein kan kjøpe julekalender, eller lage han sjølv. Det vart vanleg i Noreg med julekalender etter andre verdskrigen. Ideen om julekalender kjem frå Tyskland.

Det er òg julekalendrar på TV og som podkast. Dette er seriar med 24 episodar, og det blir sendt éin episode kvar dag i adventen.

Det er mange ulike tradisjonar og symbol som høyrer til adventstida:

• Adventsstake er ein lysestake med fire lys. Det blir tent eitt nytt lys kvar sundag slik at alle fire lysa er tent på den fjerde sundagen. Nokon framfører ein song eller eit dikt når dei tenner lysa.
• Adventsstjerne i vindauget er eit symbol frå juleevangeliet i Bibelen. Der viser julestjerna vegen til Jesusbarnet.
• Adventskrans består av grøne blad eller greinar med lilla eller raud sløyfe.

I mange familiar med barn har rampenissen blitt populær. Rampenissen er ein liten alvefigur som flyttar inn til familien 1. desember. Kvar dag i advent vaknar barna i familien til at rampenissen har gjort nye rampestrekar.

Advent er på ulike vis fastetid i Den katolske kyrkja og ortodokse kyrkjer. I protestantiske kyrkjer er det ikkje religiøs plikt å faste før jul, men i nokre protestantiske miljø fastar dei likevel.

I kyrkja er fargen lilla eit symbol på faste. Lilla farge blir brukt i kyrkjene i adventstida på grunn av denne tradisjonen. Det er òg vanleg å pynte med lilla heime når det er advent.

I Noreg i gamle dagar var det vanleg å ete lite mat og lite feitt i vekene før jul.

• kristendom
• jul
• julemat i Noreg