Via Crucis

Via Crucis

Urazion a pië via:
O Seniëur Gejù Crist, ti Via Crucis va nce al didancuei inant. Tu nes nvieies a purté pea la
crëusc; tl medemo tëmp nes mpermëtes de nes judé a la purté. Ulon dì de “sci” ala ulentà dl
Pere sun paravis, ajache son segures che la nes mëina ala redenzion.
Chël Bel Die ti à ulù tan bon al mond
che l à dat ca si sëul fi,
acioche uniun che crë te ël
ne vede nia perdù,
ma arjonje la vita eterna.
1. Stazion:
Gejù vën cundanà a mort
P.: Nëus te aduron, o seniëur, y te laudon,
J.: ajache cun ti santa crëusc es salvà l mond.
Gejù à te duta si vita mé fat dl bën y mpo vëniel cundanà. Nce nëus giudicon suënz i autri o
union nstësc giudichei. L dì ju de jënt desdruj la legrëza y la pesc.
- Gejù Crist, ulon prië per duc chëi che ie unii giudichei ngiustamënter.
2. Stazion:
Gejù pea do la crëusc
Gejù cëria la crëusc sun si sciables zënza se paré. Nscila dëssa nce fé duc chëi che ti va do a
Gejù.
Tla vita nes vëniel ciarià su d'uni sort de crëujes: malaties, la mort de zachei che on gën,
degun lëur, delujions y truep d'autri festidesc.
- Seniëur Gejù Crist, tu es purtà la crëusc de ti bona. Judenes a purté cun ardimënt uni crëusc
che te lasces pro.
3. Stazion:
Gejù toma l prim iede sota la crëusc
Gejù toma sota l pëis dla crëusc, ma l leva riesc inò su per jì inant. La streda che l Pere ti à
mustrà, ne n’ie mo nia fineda. La crëujes che on da purté te nosta vita nes sà suënz massa
pesoces y suënz nes lascions druché ju bele dala plu pitles.
- Seniëur Gejù Crist, tu es tenì tres nchin ala fin; danes la forza a ne dé nia su dan ai
problems dla vita.
4.Stazion:
Gejù anconta si oma
Maria ne possa nia mancë tl'ëura dl duel de si Fi. Ëila l anconta cun n cuer da oma, per ti sté
daujin y l cunsulé. Nce nëus vivon te na familia y sention che tucon adum. I genitores tol pert
ai festidesc di mutons y i mutons patësc pea la suferënzes de pere y oma.
- Seniëur Gejù Crist, ancunté ti oma te à dat forza sun la streda dl Calvare. Judeti nce a nosta
families, acioche genitores y mutons posse se avëi gën y se tò dl'aurela de se scuté su un cun
l auter.
5. Stazion:
Scimon de Zirene ti juda a Gejù a purté la crëusc
Gejù porta mo al didancuei la crëusc per duc chëi che patësc. Tan suënz ons’a nëus ancuntà
jënt che ova de bujën de aiut y nëus ne ti on nia judà: jënt sëula o descunsuleda, pueresc o
andicapei. Gejù à dit: “Dut chël che arëis fat a un de mi mëndri fredesc, l arëis fat a mi.”
- Seniëur Gejù Crist, lascenes udëi ite i bujëns di autri y danes la forza de judé.
6. Stazion:
Veronica ti dà a Gejù n drap de lin
Veronica, n'ëila d'ardimënt y de bon cuer cumuev Gejù cun n sëni d'amor. Chësc fat
desmostra, che te uni situazion pudons fé na bona opra. Nce nëus on suënz de bujën de
zachei che nes scota su, che nes cunsieia y nes cunsulea te mumënc de deficultà.
- Seniëur Gejù Crist, cëla sun duc chëi che patësc y lascia pro che i giape zachei che ti sta
daujin.
7. Stazion:
Gejù toma l secondo iede sota la crëusc
La streda che porta ala salvëza ie longia y sfadiëusa. Gejù toma inò. Ma ël sà che per salvé
l'umanità muessel inò levé su.
Nce nëus nes sention suënz dëibli y tumon tl picià. Ma Gejù nes juda a levé su y jì inant.
- Seniëur Gejù Crist, nce do l secondo iede che te ies tumà, ne l’es nia data su. Judenes a
avëi for la ulentà y la forza de levé su, canche tumon tl picià.
8. Stazion:
Gejù anconta l'ëiles che bredla
Gejù ti dij al'ëiles che l anconta de ne bradlé nia per ël, ma per si picëi. L'ëiles ne n’ova mo
nia capì che a fé patì Gejù ie i picëi dl'umanità, nce nosc picëi. L ie l picià che fej patì nosc
Seniëur. L ie l picià che musson cumbater.
- Seniëur Gejù Crist, tu es pensà a nëus tl mumënt plu rie. Judenes a giaurì nosc uedli per l
duel di autri, mpede pensé for a nëus nstësc.
9. Stazion:
Gejù toma l terzo iede sota la crëusc
L odio, i stritoc y la vieres desdruj l'umanità. Cun si tumé l terzo iede à Gejù ulù ti dì a duta la
jënt: Destudëde l fuech dla viulënza, fermëde la vieres, laurëde per la pesc.
- Gejù, judenes a amé ulache l vën udià, a purdené ulache l vën ufendù, a lië adum ulache l
vën strità.
10. Stazion:
A Gejù ti vëniel tëut l guant
Gejù se lascia tò dut, monce si guant. Ël uel se duné de plën a nëus, per nes nsenië a nes
destaché da nosc egoism y a servì cun umeltà.
- Gejù, tu es supurtà tan de gran mei per nes salvé. Nsënienes a miuré nëus nstësc, dan auzé
ora i defec di autri.
11. Stazion:
Gejù vën mbrucià sun la crëusc
La mans y i piesc de Gejù, che à fat tan dl bën y tan de miraculi, vën śën mbrucëi sun la
crëusc. Ma si cuer d'amor bat for mo per l'umanità. La persona ie suënz tenteda a druché ju i
autri ti tulan nsci la libertà.
- Seniëur Gejù Crist, ulon te prië per duc chëi che on fat ora stlec; judeti a ancunté zachei che
i tole su coche i ie, no coche i vën giudichei dai autri.
12. Stazion:
Gejù mor sun la crëusc
Cun la mort nes à Gejù dunà l ultimo che l pudova nes dé: si vita. Nsci nes al giaurì la porta
ala vita eterna dl paravis.
Gejù à dit: “Chi che uel salvé si vita, chël la perderà; ma chi che arà perdù si vita per mé y
per l vaniele, chël la selverà.” (Mc 8,35)
- Seniëur Gejù Crist, tu es dat ca dut; danes la forza de duné sciche tu.
13. Stazion:
Gejù vën tëut ju dala crëusc y metù tl grëm de si oma
A Nazaret ova Maria dit de sci al angiul Gabriel y ova pudù purté l Fi de Die te si grëm. Śën
dijela inò de sci y tën l Fi mort te si grëm. Chësc “sci” ie n gran sëni de speranza per nëus.
Nce nëus son datrai pra vascel de na persona che an gën; ma Gejù nes à dat la speranza che
la vita ne fina nia tlo.
- Seniëur Gejù Crist, judeti a duc chëi che ne n’à deguna speranza a udëi ite l fin dla vita.
14. Stazion:
Gejù vën metù tl sepolcher
Nce nëus muriron y uniron suplii sciche Gejù. Ël nes à nce dit che ressusciteron cun ël.
Perchël ne daussons nia nes fé dainora, sciche autri che ne n’à deguna speranza.
- Seniëur Gejù Crist, pënsa a duc nosc defonc y a nëus tl'ëura de nosta mort y lascenes
ressuscité deberieda cun té per ruvé tl rëni dla vita eterna.
Urazion:
Pere Idie, tu es per mesun de ti Fi desdrù la mort y nes es giaurì la porta dla vita eterna.
Cunzed a nëus de unì renuvei te ti Spirt per scumencé na vita nueva tl linëus de Gejù
ressuscità, che ie Die y viv y rënia cun té tl'unità dl Spirt Sant per duc i seculi di seculi.
Amen.