Palestina

Palestina (arabisk: فلسطين, Filistīn) ouk wal Ståt Palestina (arabisk: دولة فلسطين, Dawlat Filasṭin) is nen beperked erkend land in Asie, et Middenousten, in de historiske Levant-streake. Et besteyt uut twey deylen, den Gazastreapel un den Westeliken Jordaanover. De höyvdstad is Oust-Jerusalem. Den Gazastreapel ligt teagen Israel un Egype an, un hevt ne küstlyne an de Middellandske Sey. De Westelike Jordaanover (med Oust-Jerusalem der by) ligt teagen Israel an. Up et ousten grenst et an Jordanie, med de rivyr de jordaan un de Doude Sey as skeid.

Van de 193 VN-lidståten erkennet 138 Palestina as eygenen ståt. De meyste westerse landen doot dat neet un Israel ouk neet. Israel hevt in den Sesdaagsen Oorlog van 1967 en deyl van et palestynske grundgebeed inenöämen un höldt et med nen soldåtenmacht under den duum. Den Gazastreapel tröyk israel in 2005 uut vord, mär se holdet et oaver land, döär de lucht un oaver sey afeslöäten. De grense med Egypte is ouk meysttyds dichte.

In 1988 rööp de Palestynske Bevrydingsgrupe (PLO) de onafhangelikheid uut van den Ståt Palestina. In 1993 slöäten de PLO un Israel de Oslo-akkoorden. Dat sorgden vöär den uprichting van de Palestynske Autoriteit, wat seggenskap kreyg oaver en deyl van de palestynske gebeden. In 2007 nöäm de fundamentalistiske moslimgrupe Hamas et land oaver. Abbas van Fatah kreag de Westelike Jordaanover der under un wör as officiäle Palestynske Autoriteit aneweysen. Hamas hölde den Gazastreapel.

Up den 29. november 2012 wör Palestina 'wårneamend neet-lid van de VN, do as Resoluty 76/19 van den Algemeynen Vergåring van de Vereynigde Natys wör anenöämen.