Paul Whiteman
Paul Whiteman (* 28. März 1890 in Denver, Colorado; † 29. Dezember 1967 in Doylestown, Pennsylvania) weer en US-amerikaansch Orchesterbaas un Bandleader.
Whiteman weer eerst Geiger in Sinfonieorchestern. 1918 wurr he Baas vun dat Orchester vun dat Fairmont Hotel in San Francisco. Mit ditt Orchester nehm he 1920 Engagements in Atlantic City un New York an un gung 1923 dormit up Europa-Tournee. Dat Orchester harr meest symphonisch Grött un harr kommerziell bannig Spood. Dat geev Whiteman de Mögelkeit, en bedüüdend Antall vun jung, witt Jazzmusikern to engagieren, von de völ in de folgend Johren sülvst as Bandleader oder Solisten während de Swing-Ära Karriere maken sullen. Dorto hörrn insbesünnere Jack Teagarden, Frank Trumbauer, Bunny Berigan, Joe Venuti, Lennie Hayton, Eddie Lang, de Bröers Tommy Dorsey un Jimmy Dorsey as ok Bix Beiderbecke un Bing Crosby. 1924 övernehm dat Orchester in New York de Oorupführung vun de Rhapsody in Blue vun George Gershwin, orchestreert vun Whitemans Arrangeur Ferde Grofé. Whiteman hett dat Orchester bit Midden vun de 1940er Johren leit un wurr dornah Musikdirekter bi de Rundfunksenner „ABC“.
De Sound vun dat Whiteman-Orchester is mit de führend swaart Jazz-Bands vun disse Tiet nich to verglieken, besünners wegen de to’n Deel komplexen un pompösen Arrangements; aber männig Schallplaten-Upnnahmen sünd insofern düchtig interessant, as se an völ Stellen de Anfänge vun de baben nömmt Jazz-Musiker in hörenswerten Soli dokumenteeren. Whitemans musikalisch Stil wurrd ok as Symphonic Jazz betekent. Dissen Sound stell sück as bannig spoodriek rut. Whitemans eerste Schallplatenupnahm Whispering van’ September 1920 hett sück meest twee Million Mal verköfft un weer dormit de eerste Millionenseller in de Historie vun de Pop-Musik. Mit 3,4 Millionen Platten weer sien in’ September 1922 verapenlicht Three O'Clock In The Morning noch umsatzstarker. Neben disse Titels gelungen hüm insgesamt wiedere 29 Nr. 1-Platzierungen in de Hitparade.
Paul Whiteman weer in veert Eh mit de Filmschauspelerin Margaret Livingston (1900-1984) verheiraadt.
