ZOMI Thukizakna

Lom 7, Hawm 19 6 May 2012 (Sun)

Estd-2006

Tongsan Office No. 28, Pinlone 5 Bogyoke Rd., Kalaymyo Tel: 073-22395; 0947072698 Email: tongsan@zomi.org

To,

Motto: "ki-itna, lungkituakna, ngaihsutna kibang ..." Philip 2:2

KHUAHUN ZUI NUNTAK SIAMNA

Mihingte' nuntakna pen nisimin kikhel dena pawl khatte khantoh lam manawh a om bangin a khangto lo zong om hi. Khantohna pen kikhela ahih sam hangin kikhelna khempeuh khantohna kicithei khin lo hi. Tua kikhelna in khantohna a piangsak hiam cih ngaihsuthuai mahmah hi. Abeisa hunte ngaihsun kik lecin kikhelna tampi kimuthei ding hi. Nidang hunin silhleten zong kinei zo loin silhleten i neih khit ciangin Zothau kinei-in thaukaa (longnih) neite nangawn kineito hi. Zothau i neih theih ciangin galkido in, ei le ei lutang kitanin gal-ai namte i hi hi. 0Ahizongin Jesu Khrist lungdamna thu i san khit ciangin nuntakna kilamdangin Zomite in missionary i sawlkhia theita hi. Nidanga Hakai tote in tuhunin galvan lauhuai (Nuclear) le Siamsilno (Technology) lam i lunglut ta uhi. A hoih lama khantohna a om mah bangin a hoihlo lam khantohna om lam kimuthei hi. I nuntakna-ah a hoih lam le a sia lam kikhelna om a, tua pen ei deih le deihloh thu tawh kikhel thei hi lo hi. Tua ahimanin a hoih lama khantoh theih nangin leitung kikhelnate i dawntuah siam ding kisam hi. Leitung nuntakna-ah tupna kician neih masak photphot ding kisam hi. Tua i ngimna le tupna pen khaci tuh i hipah a, i tuh khaici gah mah nikhat ni ciangin i at kik ciat ding hi. Vaimim bek a cingte'n buhlebal lam-et ngamhuai loin vaimim bek mah at ding ahimanin i tuh khaici gah i at nop leh tuh masak kul hi. Anlak ma/ khaici gah i at ma in khaici kituh a, anlak le ngah ma-in piakkhiat kul masa phot cihna ahi hi. Mei tawh/ pat masak phot lohin meilum awi ding om thei lo a, sem masa nuam loin a gah bek at nuam ki-om thei ahimanin tua bang mite lawhsam ding uhi. Khaici tam a tuhte'n tam at ding uh a, tawmcik cinga tampi lak sawm pen van a aksi lak sawm mah tawh kibang hi. Khaici hoih cingte'n gah hoih at lai ding uh a, khaici hoihlo le a hut cing khate'n a gah hoih gen loh a kung zong hoih zo lo ding hi. Lo neimite'n i tuh ni in a gah a ki-at theih pah loh lam i telcian hi.Cin hun le a gah at hun kikalah hun tampi om hi. Hun tawmcik sunga gahte sawt kimang lo ahimanin bang khaici tuh/ciing leng mailam sawtpi kimangthei ding cih limtak ngaihsut kul hi. Khai tuhte'n kihaltaka a tuh uleh a gah at ding zong kihal dinga kizingtak a tuhte in a gah at ding uh zong kizing pah ding hi. Hih pen mihing nuntakna le leitung paizia ahihmahbangin mimal nuntakna ciatah a tunga i gen bangin hong tangtung ding ahi hi. James Allen in agenna-ah mihingte nuntakna huan zapi tawh genteh hi.Tua huanah khaigah hoih i ciing kei phial zongin lopa dang po veve ding hi. Mihing nuntakna pen huan zapi khaici hoih tuamtuam ciin nading mun ahi hi. Ahizongin i deihloh linglelopa dangte hong po thei zel a, tua linglelopa dang a hoih lote hah siang zel ding kitangsam hi. Linglelopa hoih lote hong po ding cih na theihkholh manin na huan pilvang taka ciinlekep kul cih zong mangngilh kei in. Ama om bangin na omsak leh na huan a lopalelingte in hong sun ding uhi. Tua manin mi pawlkhatte in mai lam nuntak nading sangin nopsakna ngaihsunzaw uhi. Eimah kimuanngamna pen gelkholhna hoih neih theih nanga kitangsam kalkhat ahi hi. Tua pen a taka kisin (Practice) nuntakna ahi hi. Siamna khat peuhpeuh kisinkholhna (practical) om loin kingah lo a, mi kisin (Practice) aneite bek mah hoih takin kimawlthei bek uhi. Lawhcin le lawhsapna akibatlohna pen mantak sepna le seplohna tungah kinga mahmah hi. By ~ N. Pau Tun Thang (Mumbai)

Thu tuamtuam (News in brief)

Double Company Kawlpi ah nasep kipanta : May 1, 2012; 9:00 am - 12:00 in Shin Hong Hall, Kawlpi ah Double Crane (Myanmar) Company thu tangkona kibawl a, Company makai Peter Khin Maung Myint, Laigelh sia Tetpaing Tun le Dr Aung San Win-te in nasepzia le cidamna tawh kisai thute gentelna nei hi. Kawlpi khuasung le mun tuamtuam pan kumpi uliante, siavuante le mipi 300 val kihel in, apai khempeuh Company pan Quality product Coffee le moh tawh vak uh a, mipi in tha ngah thei mahmah hi. Double Crane Company pen international company hi a 1987 kumin Taiwan gam pan kipan hi. Malaysia ah kum 24, Japan-ah kum 16, Singapore-ah kum 10, Brunei-ah kum 8, Indonisia-ah kum 7, Thailand-ah kum 13, Hongkongah kum 8, Kawlgam-ah kum 1 hipan hi. Cidam nading pello akisam van nam 36 kingah thei hi. Zogam, Kawlgam, Malaysia, Singapore, Japan le leitung gam tuamtuama om Zomite' adingin nasep hoih ngah theih nading hamphatna tampi om hi. Alunglutte in www.shuanghor.com ah kien thei a, pau.michael@gmail.com, Tel: 09 4926 2291, 09 40045 7757-ah kidawp thei hi. (Michael Pau, Vice Manager, Double Crane Co., Ltd.) Tutor siau kipai : Kalay University pan Zomi Siamsin pawlkhat Tutor ngah theihna laivuan dingin Mandalay ah April kha akipan Kawlgambup a om University le College pan M1, M2 mante Tutor vuan dingin Mandalay a om Na Ta Nya (ewn) zumpi-ah kisam hi. Anunung pen May 3, 2012 (Thu) ciang kisang ding hi. Tua sungah Kalay University pan Zomi Siamsin 100 val bang kihel ding cih thu kiza hi. (Siamsin Awging) Thunget khopna kinei : Kumpi lam panin Santa hantuah ding lai hong paina tawh kizui-in Kawlpi khuasung om Zomite in Santa hanmual ah May 1, 2012 7:00-8:00am sungin hankituah loh ding lunggulhna tawh thungetkhopna kinei cih thu kiza hi. Apai siampite in siampi puan silh in, tua lote in Zopuan silh tek uh cih kiza hi. (TSR) Hanlui pan Hanthak vai : Hanlui pan Hanthakah hantuah ding vai tawh kisai-in Kalay Diocese St. Mary Cathedral in kumpite thusuah zui le Catholic upna ahi misa biakpiakna tawh a kul ahimanin a utte in a ut hunhunin kituah thei hi cih Biakinnpi-ah kitangko hi. (Sia Mt. Lian St. Mary) Tutphah piakhia : Tedim Town Bapsit Youth Union (TTBYU) makaihna tawh Tedim zatopi adingin April 27, 2012 ni-in tutphah khat piakhia cih kiza hi. Nidangin zong zatopi ading mahin awngbuk, Zolengthe naitaupi gei-ah zunbuk cihte zong piakhia ngei uh cih thu TTBYU in Zolai internet media sungah thu tangkona nei uhi. (TSR) ZYA nasepna : Kawlpi ZYA in kha bei simin mun tuamtuama om Zomite sim theih dingin media

<Limited Circulation>

tuamtuam pan khasim nasepnate report piakna nei zel uhi. April kha sung nasepna te in; Sinsan thawl 4, Oxygen bung 8, Mawtaw vial 12 vei kikawm, cih bangin ZYA nasepnate online media sungte ah tukal sungin tangkona Secretary pa in nei uhi. (TSR) Agape Revival Ministry nasepna : April 10-14, 2012 ni-in ZBC Tahan ah mi 80 naupang camp bawlin gupngah mi 55, tui kiphum 32 om, April 16-22, 2012 Tahan Tuiphum Pawlpi ah, Rev. Cin Za Mung, Pr. Kham Kap Lian, Evan. Kham Khan Langh, Tg. Dal Suan Hau te in Youth camp bawlin mi 180 pha in, mi 45 gupngah, mi 33 tui kiphum cih kiza hi. (TSR) Gambup palai khampi ah thugen : UN Secretary Mr. Ban Ki Moon pen Kawlgamah April 29, 2012 ni-in a 3 vei khualzinna tawh hong tung thei a, April 30, 2012 ni-in gambup palai khawmpi ah thugenna nei thei cih kiza hi. Tua agennate sung panin "Kawlgam mipite tawh mailam nuntak khuasak a nop zawk nadingin semkhawm pangkhawm ding hihang" cih zong genkhia hi. (Monitor) NLD palai khampi kah : April 1, 2012 Kawlgam by-election kitelna panin telcing NLD Party in May 2, 2012 ni 9:30am hunin Parliament khawmpi bawlna ah gam le nam ading kamciam bawlna kammal them khat puahphatding lunggulhna a neih uh hangin phuahsakna om tuan loin a ngei mah bangin kamciam na nei cih thu kiza hi. (Monitor) Kawlgam kiciahsak ding : Thai le Kawlgam gamgiah abeisa hun sawtpi lai akipan gambelte' omna phuala om Kawlgam mite Thai kumpi thuneihte'n Kawlgam puakkik nading vai tawh kisai dongtuakte ngaisutna thu kaihkhopsakin suaktatak ngaisutpiakna le sazian lakna thak khat bawlsak uh cih kiza hi. (Internet) Tembaw kibungin mi 100 val si : India gam Assam State, Guwahati khuapi pan nisuahna leilulam Dhubri khuapi pan Km. 350 (215 miles) gamlatna a om Gun lian minthang mahmah khat ahi Brahmaputra Gunpi tungah huihpih khauhpai luatna hangin khualzin mi 300 val tuanna Tembawpi khat April 29, 2012 ni-in tumin 100 val mangcip in, 100 val mah kihonkhia zo cih kiza hi. (Internet)

Ka nuntakna thak pat kik thei hi peuhmah leng A beisa huna bangin hoih (phaden) den ding ka hanciam nawn kei dinga, khial zel in, ka hihna bang tawh lungkimin tawldam takin ka om hithiat lel ta ding hi. Naupang mawl lai bangin nungta in, na khempeuh ka thutak laklua nawn kei ding hi. Mi maingap theih dingin maitai takin ka om ta dinga, lauhuaizaw taleh phattuamna na tampi ka sem dinga, khual gamla zinin mun tampi-ah ka vak kawikawi ding hi. Nitak simin huih siangtho dikin thu tampi ka ngaihsun ta ding hi. Mual le guam a tamzaw kantanin ka kahto dinga, luiluang le tuipite a tamzaw kantanin ka galkah dinga, ka tun ngeilohna mun tun zawh na'ng ka hanciam ding hi. Maiteh le benang tuihuante ka tam nek nawn kei dinga, tuate sangin a lim theithei tampi ka nezaw ta dinga, Ice-cream pen lim nek mahmah sawm ta ding hi ing. Ngaihsut tawm haksatna tawh ka kibuaisak nawn kei ding a, a piang tatak buaina le haksatnate bek tungah gualzawh ka sawm ta ding hi. A beisa hunin kei pen a kicitaksak le a kithukhualsak mahmah khat ka hi a, tua banga ka nuntak hunsungin nop ka sak hun le ka lungkim hun om veve hi. Ahizong a beisa ka nuntakna a thakin pan kik thei hipeuhmah zen leng, lungnuam taka nuntak theih ding bek ka hanciam pen dinga, a kisam masa lo nate tawh ka hun ka mawkbei sak nawn het kei ding hi. A beisa hunin kei pen ka zin ka vakna mun khempeuhah a vot le alum tehna set ka pua den a, tuilumbawm, kawllukhu le huihlak lenna parachute cihte lo tawh ka om thei kei hi. Tun a thakin kipan thei kik ding hileng bel khual ka zin ciang tua bang vangik ka kiguan nawn kei dinga khua hun kikhelkhel mah taleh, khedap naleng zong ka bulh nuam nawn kei ding hi. Naupangte tawh ka hun tamzaw ka kipawl khawm dinga, amaute tawh tungtupeulip, tutpha kipeitheite leh luaite tung ka kiluaikhawm ta ding hi. Ahizongin kei tun ka kum 85 cing ta khong a, sih ding bek a ngak hita mawk ing ei! Translated by Francis D Lamthang Thuzaksakna: 1. Tongsan Tatman kingah kim zolo ahimanin tukal pan kipan Laidal neu tawh hong kihawmkik phot ding hi. 2. Tatman pia lote April kha bei-ah laihawm kipia nawn lo ding i cih pen Agentte'n tukha sung an hanciam lai nung hong cihna uh tawh kizui-in May kha bei dong, kha khat hong kikhintosak a, May kha bei ciang zumah sum hong lut lote laihawm hong kipiazo nawn lo takpi ding hi. 3. Khaul pan tatman hong kikhak napi Sum kempa Pa Mung khut sungah sum hong tunglo zong om tuak hi. Bangbang hileh Tongsan zumah sum lut lote laihawm hong kipia zolo ding ahimanin sum hong khakte in na sumkhakna uh nong kankik nadingun kong thum uhi. Van man tuamtuam
Antang (ay:qef;) " (aTwkd;) " ({,mrif;) Bethau Cikhum Bawngnawi Besan Aluu Saban (aT0g) E-Lan (200 g) " (500 g) Khuaimei (tvwf) " (tBuD;) 10500 11000 13000 3500 1000 700 1250 800 250 300 700 300 350 Bawngsa Voksa Aksa Ngasa Uisa Sehkhat Ak-tui Lothang san Lothang kang Ci Super Coffee Mikko Coffee Datsi G 1 Diesel G 1 5 May 2012 5000 5000 6000 4000 1500 100 500 700 150 100 100 5000 5000

Khatvei pata khat a sakol neih sunsun khat a mang hi. Tua leh a lawmte in kamsia tak uh ciai ci-in a hehnem uhi. Pata te in "Kamsia kampha cih kuan genkhol thei ahia" cihsan kik uhi. Tua zawh a sawt loin sakol mang pen hong ciah kikin a nungah sakol tampitak in hong zui a, tuate zong a mau a ahi hi. Alamte in "kampha tak uh ciai, sakol tampitak nei" ci uhi. Pata te in nuihsan kik lel uhi. Nikhat a tapa sakol tung pan kia-in a khe liam dihdih hi. Alawmte in kamsia tak uh ciai ci hi. Tua zawh a sawt loin kumpi nasemte khua sung hong pai in tangvalte khempeuh galkap lutloh phamawh ciin tangval om khempeuh tua khua pan kaikhia uhi. Sakol tung pan a kia khebaipa pen kumpi in khebaite deih lo ci hi. Alawmte in kampha tak ciai ci leuleu hi. Kamsia kampha cih pen i lungsim ngaihsutna tawh na kisaizaw hi. Na nuntakna sungah hong piang toto ding thulela khempeuhte pen i lungsim ngaihsutna dan hizaw hi. Na muhkholh bangin hong piang ding hi. A sia mit tawh na muhkholh leh a sia mah na tuak ding hi. A hoih mit tawh na etkholh leh a hoih mah hong piang ding hi. Tuahsiatna lianpi na tuak ciangin zong a hoih tawh sansiam lecin tuahsiatnate zong thupha lianpi hong suak ding hi. By ~ Joel CKMung Note: Asunga thute endik pawl

Kamsia kampha

ngaihsutna bang hikhinlo hi.