Xenética

Xenética
	ciencia, rama de la biología (es) y disciplina académica
	bioloxía

La xenética (del griegu «γεννώ», genno, asoleyar) ye la ciencia qu'estudia los xenes, l'heriedu y la variación de los organismos. El términu "xenética" foi propuestu pa describir l'estudiu de l'heriedu y la ciencia de la variación pol prominente científicu británicu William Bateson nuna carta personal a Adam Sedgwick fechada'l 18 d'abril de 1905. Bateson emplegó públicamente'l términu "xenética" per primer vez na Tercera Conferencia Internacional de Xenética (Londres, Inglaterra) en 1906.

L'heriedu y la variación constitúin la bas de la xenética. Na prehistoria, los seres humanos aplicaron les sos intuiciones sobre los mecanismos de l'heriedu a la domesticación y meyora de plantes y animales. Na investigación moderna, la Xenética proporciona ferramientes importantes pa la investigación de la fonción de xenes particulares, como l'analís d'interacciones xenétiques. Nos organismos, la información xenética xeneralmente reside nos cromosomes, onde ta almacenada na secuencia de molécules d'ácidu desoxirribonucleicu (ADN).

Los xenes contienen la información afayadiza pa determinar la secuencia d'aminoácidos de les proteínes. Éstes, a la so vez, desempeñen una fonción importante nel determín del fenotipu final, o apariencia física, del organismu. Nos organismos diploides, un alelu dominante nún de los cromosomes homólogos amazcara la espresión d'un alelu recesivu nel otru.

Na xerga de los xenéticos, el verbu codificar úsase frecuentemente pa significar qu'un xen contién les instrucciones pa sintetizar una proteína particular, como na fras el xen codifica una proteína. Agora sabemos que'l conceutu "un xen, una proteína" ye simplista y qu'un mesmu xen pue a vegaes dar llugar a múltiples productos, dependiendo de cómo se regula la so trescripción xenética y la so torna xenética.

La Xenética determina bona parte (anque non totalmente) de l'apariencia de los organismos, incluyendo a los seres humanos. Les diferencies nel ambiente y otros factores aleatorios son tamién responsables en parte. Los ximielgos idénticos (o monocigóticos), que son clones que resulten de la división del embrión, tienen el mesmu ADN pero estremaes personalidaes y güelles dautilares.

Referencies

Enllaces esternos