MAREO/DITHEKNIKI/DITLABELATHETO

 Sebopego sa sereto
Sereti ge se sekaseka sereto go lebelelwa sebopego sa ka gare le sa ka ntle. Sebopego se ka
tsela ye:

SEBOPEGO SA KA NTLE SEBOPEGO SA KA GARE

Ke mokgwa wo sereto se bopegilego ka Ke mokgwa wo sereto se bopegilego ka
gona go lebeletšwe ditemanatheto, gona go lebeletšwe diteng tša sereto. Tše ke
methalotheto le maswodikga tše di re tšweleletšago molaetša wa sereto:

 Metara le sešura

 Poeletšo:

Poeletšo ya tumanoši, sekafoko, senoko,

poeletšothomi, poeletšophetši,
poeletšokgaotši, poeletšoputla,
poeletšontšu, poeletšo ya karolontšu,
poeletšo ya tumammogo

 Ditlabelatheto:

Tshwantšhišo, tshwantšhanyo,
mothofatšo, pheteletšo, Onomatopia,
phetolaina, makgethepolelo, sekai,
phefolo, oksimorone

 Tlogelo

 Morumokwano

 Dika le diema

 Maswaodikga

 Tshwantšhokgopolo

 Kgetho le tirišo ya mantšu

Sebopego sa ka ntle sa theto
Ditemanatheto
Re lebelela palo ya ditemanatheto ka gare ga sereto. Ditemanatheto di tsebja ka maina ao a
latelago:
Temanatheto ya methalotheto ye mebedi – Khapolete (Sonete ya Seisemane fela)
Temanatheto ya methalotheto ye meraro – Tripolete/thesete
Temanatheto ya methalotheto ye mene – Khwatereine/khwanthete
Temanatheto ya methalotheto ye mehlano - Khwinthete
Temanatheto ya methalotheto ye tshelela - Sesethete
Temanatheto ya methalotheto ye šupa – Sepothete
Temanatheto ya methalotheto ye seswai – Oktheibi/okothete

Methalotheto
 Re lebelela palo ya methalotheto
 Botelele bja methalotheto – ye mekopana, ya magareng le ye metelele

Poeletšo
Ke ge lentšu/seripa sa lentšu/tumanoši/tumammogo/senoko/sekafoko se boeleditšwe ka gare
ga mothalotheto/temanatheto. Go na le mehuta ye mmalwa ya poeletšo:

Poeletšothomi
Ke ge lentšu/tumanoši/tumammogo/senoko/sekafoko se se itšego se boeleditšwe mathomong a
methalotheto ya go šalana morago temanathetong.

Poeletšofelo/phetši
Ke ge methalotheto ya go latelana e rungwa ka lentšu la go swana temanathetong.

Poeletšogare
Ke ge lentšu/tumanoši/tumammogo/senoko se se itšego se boeleditšwe mo gare,
methalothetong ya go latelana temanathetong e tee.

Poeletšo ya senoko
Ke ge senoko se boeleditšwe gantši go feta tše dingwe ka gare ga mothalotheto go gatelela
kgopolo.
Poeletšo ya sekafoko
Ke ge sekafoko se boeleditšwe methalothetong ye mebedi ya go latelana.

Poeletšo ya kgopolo
Kgopolo ye e itšego e boeleditšwe mothalothetong ya go latelana go tliša kgatelelo.

Poeletšo ya karolontšu:
Ke ge senoko goba dinoko tše di bopago karolo ya lentšu di boeleditšwe, mothalothetong.

Poeletšo ya tumanoši
Ke ge tumanoši ye e itšego e boeleditšwe gantši go feta tše dingwe mothalothetong o tee go
tšweletša mošito/morethetho.

Poeletšokgaotši
Poeletšo ya mantšu e bonala temanathetong ka mokgwa wa go kgaola methalotheto ye
mebedi/meraro ya go thoma ka go swana. Re ka re mothalotheto wa 1 o kwana le wa 4, e
kgaotšwe ke methalotheto ye 2 yeo e sa kwanego le yona.

Poeletšoputlanyi
Poeletšo ya mantšu e bonala temanathetong ka mokgwa wa go putla mothalotheto o tee. Re ka
re mothalotheto wa 1 o kwana le wa 3, go putlilwe mothalotheto wa 2 wo o sa kwanego le yona.

Potšišoretoriki
Ke potšišo yeo sereti se e botšišago e sa nyake karabo. Potšišo ye sereti se e botšiša se dutše
se tseba karabo ya yona, nepo e le go gatelela kgopolo ye e itšego.

Hlokomela: Potšišoretoriki nakong ye nngwe e tšwelela go se na leswaopotšišo. Sereti se ka

diriša lebotšiši leo le itšego.

Kelelothalo/Kgopolokeledi/Kgopolotšweledi/Entšampamente
Ke ge kgopolo ye e itšego ya mothalotheto e fetela mothalothetong wa go latela. Nakong
ye nngwe ga e felele mothalothetong wa bobedi fela, temanatheto ka moka e ka ba le
kelelothalo.
Hlokomela: Kelelothalo/kgopolokeledi/kgopolotšweledi/entšampamente ga re e bone re a e
kwa. Le ge go ka ba le fegelwana goba sekafegelwana mafelelong a mothalotheto, ge e le gona
e tla no kwagala.

Kgetho le tirišo ya mantšu

Ke tirišo ya mantšu ka mokgwa wo e sego wa setlwaedi go tšweletša kgopolo/dikgopolo.

Hlokomela: Kgetho le tirišo ya mantšu e ka tšweletša dikgopolo, maikutlo, tshwantšhokgopolo,

bj.bj. Mohlahlobi o tla go hlahla ntlheng ye, mohlala: A ka re
laetša ka fao sereti se dirišitšego kgetho ya mantšu go tšweletša maikutlo/tshwantšhokgopolo
ka gona seretong se.

Mainatheto
Ke maina a go ikgetha a theto ao sereti se a dirišago seretong. Ona a hwetšwa kudu diretong
tša thetotumišo ya segologolo.

Tshwantšhokgopolo
Ke go bona seo sereti se se tšweletšago ka leihlo la kgopolo. Sereti se re bopela seswantšho
sa seo se se tšweletšago ka tirišo ya dikapolelo, dika, diema, kgetho le tirišo ya mantšu le diripa
tše dingwe tša polelo.

Morumokwano
Ke kwano ya medumo/dinoko mafelelong a methalotheto ye mebedi. Go na le mehuta ye
mmalwa ya merumokwano e lego:

Morumokwanoputla/putlanyi
Senoko se se rumago mothalotheto wa 1 se swana le senoko se se rumago mothalotheto wa 3
mo temanathetong.

Morumokwakgaotši
Senoko se se rumago mothalotheto wa 1 se swana le senoko se se rumago mothalotheto wa 4
mo temanathetong.
Morumokwanobedi
Ke ge mantšu a mabedi methalothetong ya go latelana soneteng a rungwa go swana.

Morumokwanotia:
Ke ge senoko le seripa di boeleditšwe mo mantšung a go se swane ka sebopego mafelelong a
mothalotheto. Ntlheng ye ditumanoši tšeo di tlago pele ga senoko gammogo le senoko di a
swana (ditumanoši le dinoko di a swana)

Moko
Ke kgwekgwe ya sereto.

Molaetša
Ke thuto ye sereti se ratago go e fihliša go babadi/batheeletši ba sereto.

Moya wo o fokago/Atmosfere:

Ke seemo seo se renago ka gare ga sereto go lebeletšwe diteng tša sona.

Maikutlo
Ke ka mokgwa wo mmadi wa sereto a ikwago ka gona ge a bala sereto gomme a be a kgona
go akanya ka fao sereti se ikwago ka gona. Go na le maikutlo a sereti le maikutlo a mmadi.
Maikutlo a a ka swana goba a fapana.
Hlokomela: Maikutlo a barutwana a tla fapana go ya le ka kwešišo ya diteng tša sereto.

Tshwantšhanyo
Ke mo go bapetšwago dilo tše pedi tšeo di sa swanego. Tshwantšhanyo e tsebja ka: bjalo ka,
boka, eke ke, o kare ke, nke ke, bj.bj.

Tshwantšhišo
Ke ge sereti se bapetša selo se sengwe le se sengwe. Tshwantšhišo e tsebja ka ‘Ke’ le ‘O’

Mohlala:
Sereti se swantšha seyalemoya le khunkhwane ye e bitšwago sebobolane ka ge e tla bobola e
dutše felo gotee.
Tlemanyithalo/Kgokanyi
Ke ge lentšu le ruma mothalotheto ebile le thoma mothalotheto wa go latela. Mohola wa yona
ke go tlemagantšha methalotheto ntle le go diriša makopanyi nepokgolo e le go gatelela
kgopolo ye e itšego.

Mothofatšo
Selo seo e sego motho se fiwa dika tša bomotho.

Kemedi
Selo se sengwe se emela se sengwe.

Sekai
Sereti se diriša selo se sengwe go kaya/šupa se sengwe.

Phefolo/pebofatšo
Tšhomišo ya polelo ya go hlompha go efoga ya maroga le ya go befa.

Dibokantšu
Ke mantšu ao a bopilwego ka diripa tše pedi goba go feta tša polelo.

Kgakantšho
E šomišwa go nyenyefatša dilo tšeo ka tsebo e sego tše nnyane

Kgakantšhano
Ke mothalotheto wo o kwalago nke o a ikganetša.
.
Pheteletšo
Sereti se godiša se sengwe ka lebaka.

Tlogelo
Ke setlabelatheto se se bonalago ge go na le seo se tlogetšwego lentšung. Go ka tlogelwa
hlogo ya lentšu goba karolo ye nngwe ya lentšu. E ka lemogwa gape le ka tirišo ya leswao la
lenalana.
Thaladi
Ke mohuta wa leswao leo le laetšago gore kgopolo ya mothalotheto ga se e felele e tšwela pele
mothalothetong wa go latela.