《高空殺機》Flight Risk
🛩️ 雖然電影係用華堡哥嘅大頭做宣傳賣點，不過個人最想睇其實係戲中擔當硬淨女警嘅Michelle Dockery！
🛩️ 演而優則導嘅Mel Gibson最新作品竟然唔係《驚世未了緣》《受難曲》《阿波卡獵逃》《鋼鋸嶺》嘅大規模歷史電影，反而推出相對細格局嘅高空困獸鬥動作片，明顯睇得出有限成本製作，劇情發展係預期之內，部份誇張犯駁位甚至令人忍唔住笑出聲嘅情況！不過整體敘事節奏尚算明快，91分鐘內拍出應有緊張氣氛。
《臨時劫案》
💰 雖然一早知道編導麥啟光以及編劇陳偉斌都參與過銀河映像嘅電影製作，但本片實際出嚟嘅宿命感又無想像中咁有「銀河味」，反而令我諗起以前B尾C頭規模港產片嘅粗糙質感，所以戲中所有突兀嘅CG及嘅綠佈景，某程度都好「啱數」！
💰 電影前半段確實先聲奪人，無論係鎗戰以及不同門路嘅賊人各自處理工作，整個剪接敘事相當順暢明快！反而三位男主角真正碰頭之後節奏上比較拖拉散亂，好彩笑位尚算有趣過癮，令後段劇情不至於有太多嘅悶場。
💰 無獨有偶，今年三部香港賀歲片都用上不同年代嘅廣東歌去推動劇情，而今次《臨時劫案》就選用張學友嘅〈只想一生跟你走〉，三位男主角入面，一個係四大天王之一，一個係甚少唱廣東歌嘅台灣歌手，一個直頭喺以前大台電視劇惡攪過該天王歌手，三位合唱天王名曲演繹出極為微妙嘅喜劇效果！
💰 不能否認郭富城演戲一向用心尋求突破，而今次戴哨牙off beat演出係做到超出預期嘅喜感；任賢齊戲裡戲外好人形象再加永恆不變嘅唔咸唔淡廣東話，已經發揮出最大戲劇效果，至於林家棟、張可頤、梁仲恆就一如以往地穩陣；姜卓文、王頌茵、曾比特、Ansonbean幾位新力軍表現不過不失！John哥姜大衛絕對係全片嘅型英帥擔當！順帶一提，今年兩套賀歲片分別由不同年代嘅「姜B」擔任奸角！
《無痛俠》Novocaine
🦸🏻♂️ 關於一個無疼痛感嘅英雄故事，荷里活有《無痛俠》，我地香港有李連杰嘅《黑俠》！
🦸🏻♂️ 電影一開始對於處理血腥場面都係相當「卡通化」，明明係好痛嘅畫面但都變得有份獨特喜感，甚至有一場直頭向經典聖誕電影作出「致敬」！不過愈後愈攞你命三千，當中有兩幕甚至令我覺得，電檢處今次又咁手鬆可以IIB上映？
🦸🏻♂️ 平凡人為救心上人而捲入連串危機，故事相當簡單大路，角色性格清晰鮮明，甚至中段劇情轉折都係預料到嘅走向，不過編導將整個題材處理得流暢過癮，角色之間互動充滿自然嘅幽默，總之有齊娛樂爽片基本元素！
🦸🏻♂️ 留意Jack Quaid始於美劇《黑袍糾察隊》(題外話，即將嚟到最後一季，好期待但又怕受傷害)，然後去到上年《完美伴侶》以及今次《無痛俠》，雖然幾部都係以唔起眼男子形象示人，不過今次總算同時散發出平凡暖男魅力！同埋真係愈睇愈似老爸Dennis Quaid！
🦸🏻♂️ 值得一提，飾演本片奸角Ray Nicholson原來係Jack Nicholson公子，咦？咁我咪即係睇住兩位星二代喺戲中打生打死？
🦸🏻♂️ 話說回來，戲中有場講男主角要打支「回魂針」，當刻我聯想起《黑袍糾察隊》嘅「V24」(有睇過劇嘅就會明我會咩唔多講解喇！)
