Lappi rádjegozáhusa Avvila rádjejeagárkompaniija soalddátvuortnisdilálašvuohta ordnejuvvo duorastaga 13.8. Rájijovsseha giettis, Lohtujoga gáttis. Vuordnása addet 102 soalddátálggu.
Koronadili geažil báikki ala eai beasa soalddátálgguid lagamuččat ja bearašláhttut. Yle Sápmi ja Yle Rovaniemi sáddejitge dilálašvuođas njuolggostreama, mii lea oaidnimis Yle Areenas diibmu 10.15–11.15. Neahttastreama sáhtát geahččat dáppe.
Vuortnisdoalut álge jo gaskavahkko dáinna, ahte soalddátálggut vázze árbevirolaš vuortnisvázzima Lohtu ja Rájijovsseha guovlluin. Vázzinmátkki šattai oktiibuot birrasiid 50 kilomehtera.
Vuortnisdilálašvuođa jođiha Rádjejeagárkompaniija hoavda kapteaidna Mikko Heikkilä ja vuordnása váldá vuostá Lappi rádjegozáhusa kommandánta evearsta Jarkko Alén. Vuortnisdilálašvuođa ovdalohkkin doaibmá Sámedikki ságadoalli Tuomas Aslak Juuso.
Rohkosbottu dilálašvuođas doaimmaheaba soalddátbáhppa Mauno Hepola ja ortodoksalaš soalddátbáhppa, áhčči Rauno Pietarinen.
"Dehálaš, ahte sámi áššit vuhtiiváldojuvvojit rádjegozáhusa doaimmain"
Sámedikki ságadoalli Tuomas Aslak Juuso muitala, ahte lei somá oažžut bovdehusa rádjejeagárkompaniijas.
– Válddán dan duođas. Ulbmil lea maiddái beassat vehá humadit rádjekompaniijain ja oahpásmuvvat sin doibmii. Dat lea dehálaš Sámediggái, ahte sámi áššit vuhtiiváldojuvvojit sin doaimmain, dadjá Juuso.
Ii leat vuosttaš geardi go Sámedikki njunuš lea vuortnisdilálašvuođas ovdalohkkin. Jagis 2017 daláš Sámedikki ságadoalli Tiina Sanila-Aikio doalai ovdalohkama Soađegili Jeagárprikáhta vuortnisdilálašvuođas.
– Dat ii leat jur juohke jahkásaš vierru, muhto dieđusge lea buorre, ahte sápmelaččaid rolla maid váldojuvvo mielde ráji doaimmain ja rádjekompaniija bargguin. Dan dihte lea illu vuolgit dohko, dadjá Juuso.
“Ii das olus muitte, go ledje nu nahkárat”
Tuomas Aslak Juuso ieš lea maid čađahan soahtebálvalusa Avvila rádjejeagárkompaniijas 16 jagi áigi ja su mielas leage gelddolaš beassat čuovvut vuortnisdilálašvuođa dál eará rollas.
– Mii leimmet oalle váibasat dalle, ii das nu olu muitte. Leimmet vázzán 50 kilomehtera badjelaš 12 diimmus. Doppe mii čuoččuimet ja vuortnuimet iežamet jáhkehahttivuođa ja čanastumiid Suoma stáhta suodjaleapmái. Dat lei dego vehá nahkáriid siste diet dilálašvuohta, bohkosa Juuso.
Lappi rádjegozáhusa Rádjejeagárkompaniija lea Suoma ja olles Eurohpa uniovnna davimus soalddáhiid skuvlenbáiki. Avvilii doaibmabáiki vuođđuduvvui álgoálggus danin, ahte sápmelaš bálvalusgeatnegasain livččii vejolašvuohta čađahit soahtebálvalusa iežas ruovttuguovllus.