Eamiálbmogiidda dárkkuhuvvon ásodatskuvlla guovllus Kamloopsis, Kanádas leat gávdnan 215 máná bázahusaid, muitalit guovllu eamiálbmogiid ovddasteaddjit.
– Muhtimat sis ledje sullii golmma jahkásaččat, muitala Tk'emlúps te Secwépemc -álbmoga jođiheaddji Rosanne Casimir.
Bázahusaid gávdne badjelaš vahkku dassái dutkanrusttegiin. Rosanne Casimir árvala, ahte doppe soitet gávdnot vel eamboge bázahusat, dasgo eai leat dutkan buot guovllu báikkiid.
Eamiálbmoga ovddasteaddjit leat dál dutkamin ášši jápminsivadutkiiguin ja museaiguin, vai oaččošedje eambo dieđuid das, mii daidda mánáide lea dáhpáhuvvan.
– Mu váibmu cuovkana. Dát muittuha min riikka sevdnjes ja heahpatlaš áigodagas, čálii Kanáda stáhtaministtar Justin Trudeau Twitteris.
Kamploosa ásodatskuvllas lei oahpahus jagiin 1890–1969. Daid jagiid áigge skuvllas ledje oktiibuot 500 máná. Skuvlla oamastii stáhta, muhto das fuolahii katolalaš girku.
Duháhat eamiálbmotmánát jávkan ásodagain
Kanádas leat viggan assimileret eamiálbmogiid bákkuin ja dan dihte stáhta vuođđudii 139 ásodatskuvlla eamiálbmotmánáide. Mánáid dolvo veagal ásodagaide, gos sii eai ožžon hállat iežaset gielaid eaige hárjehit iežaset kultuvrra.
Stuorra oassi mánáin gárte vásihit maiddái veahkaválddi ja seksuálalaš illasteami. Duháhat mánát jávke dain skuvllain. Skuvllaid oamastii stáhta, muhto girkut bajásdolle daid.
Ovddeš ásodatmánáid organisašuvdna Indian Residential School Survivors Society gáibida poavas vástádusa, manin eamiálbmogiiguin leat láhtten ná.
Eamiálbmogiid jođiheaddjit oaivvildit, ahte dát unohas vásáhusat leat vuođđun reserváhtaid váttisvuođaide alkoholismmain ja narkotihkaiguin.
Kanáda ráđđehus bivddii jagis 2008 virggálaččat ándagassii eamiálbmogiin. Dan oktavuođas sohpe ovddeš ásodatskuvllaid oahppiiguin 1,9 miljárdda Kanáda dollára buhtadusain.
Yle Ođđasiid Sámis ja Beaivvi ságaid sáhtát maid guldalit Yle Areenas.