Avelist Ainolast uárnejii onne tuorâstuv Säämi kielâkähviviäsu-tábáhtus. Kielâkähviviäsu ulmen lii leđe kuáhtámsaje sämikielâi sárnoid tääl ko lii sämikielâi okko.
Kyehti ive Avelist aassâm Junnáás-Haanu Ailâ, Aili Mattus lâi meid puáttám kähviviistán. Sunjin Ainola lâi jo muuneeld uápis saje.
Suu mielâst puávtáččii eenâb-uv leđe tágáreh káhvástâllâmpuudah sämikielân. Ij tuše sämikielâi ohhoost.
– Tot kale ličij aaibâs pyeri já vaarâ puáhtá puáttiđ-uv taan maŋa ko uárnejii taam, sun arvâl.
Sun kuittâg tuáivu, ete ij aaibâs jyehi ohhoost, mutâ jyehi mánuppaje ličij vuovâs.
Meid Njellimist ulmuuh lijjii puáttám kielâkähviviistán. Njellimlâš Matti Valle vuolgij tuše peivikäähvi tiet Njellimist Avelân.
– Tääbbinhân lii šiev saje tággáár, sun arvâl kielâkähviviäsust.
Tábáhtusâst meid keččii uánihisfiilmâid anarâš- já nuorttâlâškielân. Tábáhtus uárnejeijeeh láá Aanaar kieldâ, Sämitigge já Säämi máttááttâskuávdáš.
Tave-eennâmlâš sämikielâi okko lii 25.–31.10.2021.
Kuldâl lase anarâš saavâid tääbbin.