Guovvamánu 4. beaivve 2022 lei borga ja dat dagahii garra dálkki duoddaris. Polesii bođii dan bearjadaga eahketija seavdnjat áigge heahtetelefovdna Anára Suoločielggi guovllus. Olgoriikalaš nissonolmmoš muitalii iežas láhppon ja lei čielgasit heahtedilis.
Ohcama fertii álggahit jođánit, muitala boarrásut konstábel Matti Näkkäläjärvi Anár bolesstašuvnnas.
– Mii vulggiimet golmmas ja ordniimet nu ahte guovttis čielggadit Suoločielggis dili ja mun vulgen mohtorgielkkáin ohcat. Go olmmoš ii gávdnon dan meahccestobus gos navddiimet, de šattai stuorit, heahkka ohcandárbu. Dábálaččat mii leat álot guovttis ovttafáro, muhto dál dilli lei dakkár go lei, de dagaimet ná, čilge Näkkäläjärvi.
Buorrelihkus son gávnnai láhppon olbmo viehka jođánit. Olmmoš lei juo sakka galbmon, giessasan, borgahan lei ja muohta juo skálvin čoggon dasa birra, ii son lean guhká šat ceavzit, árvala Matti Näkkäläjärvi.
Dán ánssolaš barggu ovddas Lappi boleslágádusa boarráset konstábel Matti Näkkäläjärvi lea dál ožžon bolesa silba ánsomedálja.
Guovllu dovdamis lea ollu ávki dalle go dálki lea vearrái ja áigi unnán
Lappi boleslágádus ákkastalai polesa silba ánsomearkka mieđiheami dán dáhpáhusa ovddas dainna, ahte Matti Näkkäläjärvi doaibma čájehii vásttolašvuođa ja geatnegasvuođadovddu.
Áigi lei unnán ja dálki garas ja son hárjánan meahccejohttin ja guovllu dovdama veagas basttii doaibmat okto maiddái dákkár dilis. Guovllu dovdamis lei erenoamáš ollu ávki dán doaimmas, poleslágádus ákkastallá.
Lismmá gilis bajásšaddan Jussa-Ándde Bávlosa Matti leamaš eanaš áigge polesin Anár polesstašuvnnas. Polesa silba ánsomearkka báiki ruovttus ii leat vel áibbas dieđus. Go dál lea easkka okta mearka, de ii leat vel lássaskáhppe dan várás.
– Somáhan dat orro go ná muitet. Dalle lea dakkár dovdu ahte mas nu dás lea lihkostuvvange, no leahan gal vissa máŋga earáge barggu lihkostuvvan, láhttesta Matti.
Beaivvi ságaid ja Yle Ođđasiid Sámis sáhtát maid guldalit Yle Areenas.