Luonddusuodjalanvuođđudus Luonnonperintösäätiö lea álggahan kampanja davimus Sámis leahkki Eurohpa maŋimuš luondduvuvddiid suodjaleapmin. Vuođđudusa mielde Lappi luondduvuovddit leat dehálačča davvin šaddi boares vuvddiid šlájaide.
Oassi vuvddiin lea jo suodjaluvvon, muhto vuođđudus hálida suodjalit eará guovlluid vuovdečuollamiin.
– Midjiide fállet olles áigge guovlluid, maid suodjalit. Mii hálidat dorvvastit ruđalaš dili, ahte bastit oastit ja suodjalit daid, muitala doaimmajođiheaddji Pepe Forsberg.
Kampanja lea álgán dán vahku vuossárgga ja bistá golbma jagi. Kampanjai lea dahkkon iežas neahttasiidu, gos gávdnojit dárkilut dieđut mo oassálastit kampanjai.
– Mii hálidat dáinna kampanjain čalmmustahttit vuvddiid dili dán máilmmi dilis. Mis leat ain leahkimin čáppa luondduvuovddit davimus Sámis, mat eai leat suodjaluvvon. Dál álgá leat maŋimuš áigi suodjalit daid, dadjá Forsberg.
Luonddusuodjalanvuođđudus Luonnonperintösäätiö lea vuođđuduvvon jagis 1995 suodjalit Suoma luonddu, erenomážit áittatvulos vuvddiid. Vuođđudus oastá eatnamiid ja vuvddiid bissovaš suodjaleami várás.
Beaivvi ságaid ja Yle Ođđasiid Sámis sáhtát maid guldalit Yle Areenas.