Eamiálbmotáššiid Indigenous Russia -neahttasiidu lea giddejuvvon Ruoššas, muitala Barents Observer. Indigenous Russia -siidu vuođđuduvvui máŋga jagi dassái čuovvut Ruošša eamiálbmogiid dili ja vuoigatvuođaid ollašuvvama.
Geassemánu loahpas Ruošša váldegottesivaheaddji bivddii Kreml mediadoaimmahaga Roskomnadzoris doaibmabijuid eamiálbmotsiiddu ráddjemii. Dál siiddu ii beasa šat lohkat Ruošša bealde.
– Eiseválddit hálidit, ahte Ruošša eamiálbmogat eai dieđe maidige riikkaidgaskasaš rivttiin ja das, mo sii sáhttet geavahit dan vuoigatvuođaideaset dorvvasteapmái, muitala siiddu váldodoaimmaheaddji Dmitry Berezhkov Barents Observerii.
– Ná Ruošša hálddahus suodjala iežas álbmoga váralaš dieđu oažžumis, nappo eamiálbmogiid vuoigatvuođain, dadjá Berezhkov.
Indigeanous Russia -siidu lea juo jahkeviissaid almmustahttán dieđu eamiálbmogiid forumiin nugo ON:a čoahkkimiin sihke eaŋgalas- ja ruoššagillii. Siidui leat laktán maiddái dieđuid ovdamearkka dihte Ruošša fallehemiin eamiálbmogiid vuostá, nu mo fitnodagaid birasrihkkumiin. Neahttasiiddus leat maiddái almmuhan ođđasiid Sibirjjá vehádagaid kultuvrras.
Indigenous Russia -siidu doaibmá goittotge ain Ruošša olggobealde.