Geassi lea čáhcecrossvuddjiide hohppos áigi, go gilvvohallit fertejit johtit birra Suoma ja Norgga vuodjimin gilvvu. Čáhcecrossas lea šaddan Davvi-Suoma uhcit báikegottiide dehálaš válaštállan ja boahtte vahkkoloahpas sirkus joavdá Avvilii.
Avvillaš čáhcecrossvuoddji Ossi Kiviniemi gávnnai gilvošlája nuorra gándan. Lea álot gelddolaš dovdu go ruoná leavga šlivggiha ja gássa lea bodnis.
– Oalle unnán dihten, go nuorran ruovttugilis oidnen dan vuosttas háve. Dalle jurddášin, ahte orruba hávskes ja oalle álkes šládja, muhto galba unnán dihten dalle, boagusta Kiviniemi.
Kiviniemi lea gilvalan rabas luohkás moadde jagi. Vahkkoloahpa gilvvuide Avvilis leat boahtimin oktiibuot 83 oassálasti. Oassálastiid gaskkas leat máŋggat Eurohpá ja Suoma meaštárat.
– Ferte gal botnjat das ja šaddet buorit bárut. Olu muitala dat, ahte dán geasi ieš vuodjin leamašan dušše guokte diimmu, ja stállas lean dádjon sullii 200 diimmu. Oalle garra hommá dát lea, dadjá Kiviniemi.
Čázi alde skirvehallan geasuha olles áigge ain nuorat gilvvohalliid
Juohke jagi čáhcecrossgilvvuide váldit oasi eanet ah´ eanet vuoddjit. Maiddái nuorat sihke Suomas ja Norggas leat dohppehallan gilvošládjii, man bárut dolvot fárusteaset.
Guovdageaidnulaš Esaias Sokki gávnnai čáhcecrossa skohtervuodjima bokte.
17-jahkásaš Sokki lea oahpahallan skruvet ja divvut iežas skuhtera čáhcecrossii heivvolažžan. Dát lea sutnje vuosttas geassi čáhcecrossgilvvuin.
– Gilvvut leat mannan bures, vaikko lihkku ii leat leamaš. In leat vuos vuoitán gilvvuid. Pello gilvvus mus lei beare garra jietna skuhteris, nu in ožžon čuoggáid doppe, dadjá Sokki.
Sokki vuodjá dál semi pro -luohkás, mas gilvvohallit vudjet bealleámmátlaš dásis ja lea maid ráhkkaneamen gilvvohallat Avvilis. Ovdal gilvvu ferte goit vel divustit skuhtera buoremus ortnegii. De dušše ii leat go geahččat, mo gilvvuin manná.
– Dalle go vuodjá, ii ábut stresset. Ferte beare deaddit olles gássain ja vuodjit nu olu go nagoda, dadjá Sokki.
Suoma meašttir háliida doarjut ja veahkehit nuoraid
Vaikko dán geasi leat velá moattit čáhcecrossgilvvut, de lea Suoma meašttirvuohta juo čielgan. Avvillaš Pasi Leivo lea dán jagáš Suoma meašttir.
Son lea vuodján gilvvu 17 jagi rabas luohkás ja oaidnán man jođánit gilvošládja lea mannan ovddos guovlluid.
– Juohke stárttas ferte čárvut gássa ja girddihit garrasit, go das lea juo oalle garra dássi. Lea somá oaidnit, mo dát ovdána ja nuorat bohtet fárrui, illuda Leivo.
Stártta áigge soaitá dáhpáhuvvat olu. Gilvvus lea dehálaš doallat garra leavttu. Leivo lohká, ahte sus lea buoremus muttus leaktu juoba 120 km diimmus.
Buot dehálamos lea vuddjiide leamašan goittotge gilvobáikkiid vuoigŋa. Leivo háliida movttiidahttit nuoraid gilvovuodjimii ja muitala, ahte veahkki lea álo oažžumis boarrásut gilvvohalliin. Son sávvá, ahte čáhcecrossa vudjet velá 30 jagi geažesge.
– Sávvamis eat vel dalle šleađgagielkkáiguin vuoje. Mohtoršurahan dat olbmot bohtet geahččat, ja dan sii gal ožžotge, bohkosa Leivo.