Gáranasvári bisánansaji buohta leat meahccái bálkestuvvon čuođenáre guoli guohcagit. Báiki lea Anáris davás birrasiid 14 kilomehtera.
Sullii 10–15 sentimehtera guhkkosaš vuskkonat ja čuovžžat leat leamašan meahcis jo guhkit áigge. Guolit leat guđđojuvvon geaidnogurrii jáhkkimis juo dálvet, dadjá Anára gieldda gohccišibitdoavttir Eva Anunti.
Ii leat diehtu gos guolit leat dohko ihtán. Anunti árvala ahte gii nu lea dálvet oggon eanet guliid go leamašan dárbu ja mearridan bálkestit daid lundui.
– In dohkket dáhpáhusa. Dát ii leat leamašan buorre ja luonddu gudnejahtti vuohki guolástit. Ášši livččii sáhttán čoavdit máŋgga earálágan vugiin, lohká Anunti.
Anunti oainnu mielde guliid ii leat goit dárbu fitnat čorgemen eret, go dat eai šat guohcat ja dagat hádjaváttisvuođaid eaige dat leat čázádaga lahkosis.
Anára gieldda birasdárkkisteaddji Toni Pyykönen lohká, ahte gažaldat sáhttá leat nuoskkideamis, muhto go sáhka lea biobázahusain, de dat ii leat lundui noađđin. Eará láhkai stuorra guollemearri gal sáhttá hehttet, dego unohas hájain eaige dat soaitte leat čalbmái čábbát.
Meahciráđđehusa virkosmahttin sierraáššedovdi Kirsi Ukkonen muitala, ahte jus guolit livčče vierisšlájat, daid ii oččošii guođđit lundui.
– Livčče buorre hávdádit guliid, váikko galhan lottit ja eará rábbeborrit atnet fuola dain oalle johtilit, dadjá Ukkonen.