Ijahis ijas holbbit šlivgot ja čiŋat šearrájit gilvvu lávdečuovggaiguin. Arvves dálki ii hehtten festiválagussiid bearjadaga.
Xia Torikka,
Vesa Toppari
Eamiálbmogiid musihkkafestivála Ijahis idja álggii bearjadaga Anáris. Lávddi alde loaiddastedje earret eará Ravggon, Ánnámáret, Lávre, Tundra Electro ja Kevin Boine.
Arvves dálkkis fuolakeahttá báikki ala ledje čoahkkanan olu olbmot guldalit musihka ja návddašit festiváladovddus.
Laura Tapiola lea háliidan iežas gáktái lupmaid ja skuohpu, vai lea vuogas. Govva: Vesa Toppari / Yle
11-jahkásaš Nils-Máhtte Paltto vurddii eanemus oaidnit Kevin Boine. Govva: Vesa Toppari / Yle
Mihkku Näkkäläjärvi mielas arvi ii hehtte vehášge, muhto árvala ahte soapmasiid soaitá hehttet. Govva: Vesa Toppari / Yle
Elle-Máárjá Siltala lea coggan suohkuid nu mo dálá áigge lea treandan. Sus lea maid ođđa solju. Govva: Vesa Toppari / Yle
Lauri Semenoff osttii gáibagahpira, go heivii su gáktái. Lilja Ljetoff ja Emma Krupula leigga herven vuoktačiŋaid, mat leat dego feastaveršuvdna nuortalaš nieidda gahpiris. Govva: Vesa Toppari / Yle
Detáljat Emma Krupula vuoktačiŋas. Govva: Vesa Toppari / Yle
Milla Kivilevo lei gorron alcces ođđa veaskku. Julius Mihkkal Lindis fas lei áibbas ođđa gákti, man geavahii dál vuosttas háve. Niila-Juhán Valkeapää gohčoda iežas gahpira čsv-gahpirin. Govva: Vesa Toppari / Yle
Melanie Sarre lea movttáskan speallavearkkas ja bearraliin. Govva: Xia Torikka / Yle
Helmi Ljetoff beasai dál vuosttas háve albmaláhkai festiválii, ovdal son lea oassálastán fal mánáidbeaivái. Govva: Vesa Toppari / Yle
Festivála láidesteaddji Áslat Holmberg lea oahpis daidda, geat leat ovdalge fitnan Ijahis ijas. Son ii muitte dárkilit man gallii lea láidestan dáhpáhusa, muhto dál lei ain jo viđat geardi. Govva: Vesa Toppari / Yle
Máiju-Siggá Seurujärvi háliidii čiŋadit árbevirolabbot. Govva: Vesa Toppari / Yle
Marielle Näkkäläjärvii ja Tia-Káren Alakorvai lea dego ”must”, festivála gosa lea bággu beassat. Govas gaskku maid Helmi Ljetoff. Govva: Vesa Toppari / Yle
Hilma Mustonen lea vásihan jo máŋggaid Ijahis idja -festiválaid. Arvige ii hehtten su eahkeda. Govva: Vesa Toppari / Yle
Festivála joatkašuvvá lávvardaga. Dalle lávddi ala gorgŋot earret eará Mari Boine, DJ-guovttos Ailo ja Idja, ja Amoc ja Ailu Valle.