Kari Kyrö Anáris beassá dál vuosttas geardde sámediggái válggaid goalmmádin stuorámus jietnameriin, 189 jienain.
Kyrö ii lean máhttán ráhkkanit ná stuorra jietnasállašii.
– Jietnamearrái ferte leat duđavaš, dat lei olu stuorát go máhtten vuordit. Giittán jienasteaddjiidan dan luohttámušas, man sii leat munnje čájehan, Kyrö giitalii maŋŋebárgga Yle Sámi Tiervâ-sáddagis.
"Mii fertet soabadit"
Kari Kyrö deattuha soabalašvuođa mearkkašumi sámedikki barggus.
– Soabalašvuohta lea munnje buot dehálamos. Mii, unna álbmot, fertet eallit soabalaččat. Mis sáhttet leat iešguđetlágan oaivilat áššiin, muhto eanetlogu oaidnu vuoitá ja dan ferte čuovvut ja dohkkehit.
Kyrö lohpida ieš bargat soabalašvuođa ovdii.
– Mun in gávnna sámedikki ođđa áirasiin ovttage dakkár olbmo, geainna in sáhtášii láhttet soabalaččat. Jearaldat lea váidagis áššiin, muhto mii fertet birgehallat guhtet guimmiideametguin ja mii bastit dan bargat, jos fal hálidat, Kyrö oaivvilda.
Ii leat evttohassan ságadoallin
Kari Kyrö ii áiggo álgit sámedikki ságadoallegilvui.
– In eisige leat ságadoalleevttohas, Kyrö muitala.