Lágaš olbmon ovttas bargan lea iežas dáiddačehppodat. Anárlaš Sami Laiti goit čađahii duodjeoahpu áhčis geahču vuolde. Dán barggu ovddas anárlaš silbarávdi Petteri Laiti oaččui jagi bargosadjeskuvllejeaddji- bálkkašumi.
Anárlaš Sami Laiti goitge čađahii guovtti jagi oahpahalli-oahpuid sámi duojis áhčis skuvlejumis ja áigu joatkit oahpuid gitta duodjemeašttir dássái.
Gaskkohagaid silbaduoji oahpahallan ii mannan nu álkit
– Hirbmat váttis lea leamaš muhtumin. Áhčči lea meanddo lágaš olmmoš leat bargoaddin, dadjá duodjeoahpahalli Sami Laiti.
Dárkilut son ii goitge háliid čilget, makkár mohkit sudno oktasaš oahppobálgá alde leat leamaš.
Oahppočájánassan silbačiŋaid ja bargobiergasiid náhki ávnnasteapmái
Oahpahalli oahppočájánasa addimii lei áigi vihtta beaivi. Dan áiggis Mihku-Biehtara Sami duddjui silbačiŋaid ja bargobiergasiid náhki ávnnasteapmái.
Diet oahpu lea dál duogábealde, muhto dien barggu ovddas Mihku-Biehtar, Petteri Laiti bálkkašuvvui jagi 2013 bargosadjeskuvlejeaddjin.
Su mielas lea buorre, ahte dakkár doaimmat čalmmustahttojuvvojit:
– Fáhkkestaga, das leage oalle stuorra mearkkašupmi, go mun lean jo njealjelogi jagi vehá lean oahpahan ja rávven olbmuid duddjot, earret eará leamaš kurssaid jođiheamen jo 1970- ja 1980-logus, govvida Mihku-Biehtar iežas bálgá oahpaheaddjin.
Duddjot lea suohttasut go dihtorastin
Duddjot lea dat, maid Sami-bárdni háliida joatkit ja dan suorggis boahttevuođas maid bargat. Duddjoma válljen lei sutnje oalle álki.
– Duddjoma gal lei álki válljet. Mun fuomášin, ahte mun liikon duddjot inge šat liikon dihtora ovddas čohkkat, loahpaha Sami Laiti.