Sámedikki válgalogahallan čavčča 2023 válggaide lea gárvvis. Lohku sis geain lea jienastanvuoigatvuohta loktana dál vuosttas geardde badjel guđa duháha.
Válgalávdegoddi lea dohkkehan 507 ođđa olbmo válgalogahallamii. Jienastanvuoigatvuohta lea dál 6 043 olbmos.
Válgalogahallamii ohcan nogai mannan jagi maŋimuš beaivve ja dalle ožžo válgalogahallamii ohcat ovdamearkan nuorat, geat leat ovddit válggaid rájes, njealje jagis, šaddan jienastanahkái.
Válgalogahallan ásahuvvo oaidnin láhkai njukčamánus
Válgalávdegoddi postegoahtá dál almmuhuskoartaid jienastanvuoigatvuođas ja válgalogahallama oaidnin láhkai doallamis.
Vel njukčamánus válgalávdegoddi ásaha válgalogahallama oaidnin láhkai. Dan beassa oaidnit áigodagas 20.3.–31.3. Dalle juohkehaččas lea vejolašvuohta fitnat dárkkisteamen maiddái iežas guoskevaš dieđuid.
Jus olbmo iežas dieđut leat válgalohallamis boastut dahje olmmoš oaivvilda ahte su leat eahpevuoiggalaččat guođđán eret válgalogahallamis, de sáhttá son čállit njulgengáibádusa válgalávdegoddái. Dan mearreáigi dievvá cuoŋománu 14. beaivve diibmu 16.
Evttohasvuođaid smiehttan álgá – borgemánus dievvá mearreáigi
Válgalávdegoddi almmuha sierra gulahusain goas evttohasaid ásaheapmi álgá. Sámediggelága mielde evttohasaid ásaheapmi Suoma Sámedikki válggain nohká 31 beaivve ovdal válgga álgima. Dat mearkkaša dáin válggain 4.8. diibmu 16.
Ieš válgga doaimmaheamis lea mearriduvvon ahte dat dáhpáhuvvá áidodagas 4.9.–2.10. Jienastit sáhttá juogo poastta bokte dahje nu, ahte doaimmaha válgaáššegirjjiid válgalávdegotti doaimmahahkii. Daidda leat guokte sierra áigemeari.
Nu mo válggain dábálaččat, de maiddái Sámedikki válggain lea vejolašvuohta dárbbu mielde jienastit dikšunlágádusas dahje ruovttus. Dainna áššiin ferte leat vuos oktavuođas válgalávdegotti doaimmahagain.
Válggaid bohtosa ja ná sámediggeáirasiid áigodahkii 2024–2027 válgalávdegoddi nanne golggotmánus, 4.10.2023.