Sámedikki válgalávdegoddi lea nannen jagi 2023 válgalogahallama, muhto dohko eai leat čáhkadan buohkaid, geaid AHR lea ovddit válggain dohkkehan dohko.
Válgalávdegoddi dadjá, ahte sin geatnegasvuohtan lea viggat dorvvastit dan, ahte válgalogahallan čuovvu lága ja álbmogiidgaskasaš olmmošvuoigatvuođasoahpamušaid. Válgalávdegotti mielas sii, almmolaš válddi geavaheaddjin, galget fuolahit das, ahte válgalogahallan lea lága mielde ráhkaduvvon ja ahte olbmuiguin meannudit ovttaveardásaččat.
– Stáhta ii sáhte gáibidit, ahte válgalávdegoddi doaibmá riikkaidgaskasašrivttiid vuostá ja seammás maiddái iežas álbmoga vuostá, dadjá sámedikki válgalávdegotti ságajođiheaddji Aslak Pieski.
ON olmmošriekte- ja nállevealahankomiteat leat gávnnahan, ahte Suopma lea rihkkon riikkaidgaskasaš soahpamušaid, go alimus hálddahusriekti lea dohkkehan olbmuid sámedikki dáhtu vuostá válgalogahallamii. Dát jienastuslohkui dohkkeheamit leat loavkidan sámiid iešmearridanrievtti, ákkastallá válgalávdegoddi.
AHR mearrádusat leat jagiin 2011, 2015 ja 2019.
Ovdamearkan sámediggeáirras Kari Kyrö lea okta dain olbmuin, gii dohkkehuvvui jagis 2011 AHR mearrádusain válgalogahallamii.
Maid ovdamearkka dihte jagi 2019 válggain Sámedikki válgalávdegoddi geavahii iešnjulgema ja válddii lagabui čuođi olbmo eret jienastuslogus.
Sámediggeválggain leat dán jagi olahus olu jietnavuoigadahtton olbmot, vuosttaš háve badjel 6 000. Ođđa jienasteaddjit ledje guovtte geardde eanet go mannan válggan jagis 2019.