Tääl jieš kiäst-uv lii máhđulâšvuotâ čuággiđ já vyebdiđ muorjijd. Ive aalgâst vuáđudum Pohjois-Lapin Ruoka -seervâs uástiškuát páihálijn muorjijd syeinimáánu loopâst. Lapin ruoka -nommâsâš haahâ hástá kieldâid uástiđ luándumuorjijdis páihálijn.
Muorjij vyebdim tuáimá nuuvt, ete jyehi kundá uástá jieijâs kuávlust páihálijn muorjijd. Jyehi kundáást lii ovdâolmooš, kiäst puáhtá koijâdijd lasetiäđuid já almottiđ, ko láá myerjih vyebdimnáál.
Uáivimyerjih láá juŋŋâ já sare, mutâ sij uástih meid etimâsâid, vuorâččâsmuorjijd já stuorrâjeggijuuŋâid. Luámánijd uástih ucemustáá, ko toh láá tivrâsumoseh, muštâl servâs toimâjođetteijee Merja Ahola.
Muorjijd älgih virgálávt uástiđ syeinimáánu 31. peeivi ja muorjijn mäksih siämmáá ennuv ko mii tukkuhadde lii. Myerjih kalgeh leđe vorrâseh, putestum, ige taid koolgâ kieđâvuššâđ mahten, tego ovdâmerkkân jiäŋudiđ.
– Taat lii tääl taggaar keččâlem. Jis taat veikkâ movtidičij ulmuid vyelgiđ muorjiđ, tuáivu Ahola.
Pohjois-Lapin Ruoka -seervâs pyevtit já vuábdá purrâmušpalvâlusâid ovdâmerkkân Laapi pyereestvaijeemkuávlu sosiaal- já tiervâsvuotâpalvâlus tárboid. Servâsân kuleh Suáđikylá, Ucjuuhâ, Aanaar, Pelkosnjargâ ja Suovâkuoškâ kieldah. Servâs vuáđudmân šoodâi tárbu ko ive aalgâst ovdâsvástádâs purrâmâšpalvâlusâi pyevtitmist sirdui pyereestvaijeemkuávlun, muštâl Ahola. Sii ulmen lii kevttiđ páihálijd purrâmušamnâsijd nuuvt ennuv ko máhđulâš.