Anár Pride čohkkii mannan lávvordaga olu olbmuid ávvudit ráhkisvuođa Anára girkosiidii. Čoaska dálkkis fuolakeahttá oassálastiid mokta lei badjin.
Anárlaš Anna Morottaja lei dán jagaš dáhpáhusa suodjaleaddji. Morottaja lei hui mielas, go su jerre suodjaleaddjin. Prides lea sutnje obalohkái stuorra mearkkašupmi.
– Dát lea ráhkisvuođa ja earálágan ráhkisvuođaid ávvudeapmi, juohkehaš oažžu leat dakkár go lea. Áiddo dat, ahte jerre mu suodjalit Anár Pride, de Anár lea mu ráhkis gilli, ja dát gilli šaddá juohke jagi oanehis ja maiddái guhkes lávkkiiguin buohkaide buoret báikin eallit, de galhan dat mearkkaša olu, dadjá Morottaja.
Anára gieldda nuoraidráđđi lágidii Anár Pride -dáhpáhusa juo nuppes. Morottaja mielas lea mávssolaš, ahte justa nuorat háliidit čalmmustahttit arvedávgeolbmuid ja seksuálavehádagaid.
– Go sidjiide leamašan dehálaš ordnet dákkár dáhpáhusa, de sii leat oaidnán dárbbu dasa. Ahte sis lea buorre ássat Sámis, sii eai fárre máttás dan dihte, ahte dát báiki ii dohkket sin dakkárin go sii leat. Galhan dat lea hirbmat dehálaš doarjut nuoraid, dadjá Anna Morottaja.