Boares dávviriid ja muitalusaid luossabivddus háliidit rádjat boahttevaš Luossaguovddážii, man plánejit Ohcejohkii. Vel ii leat diehtu goas guovddáš beassá álggahit doaimmas geavatlaš sivaid dihte, muhto mokta guovddážii goit gávdno.
Gielddahoavda Päivi Kontio bovde buot gieldalaččaid fárrui ollašuhttit Luossaguovddáža. Son lea gárvvis vaikko iešge coggalit bargogistáid ja dohppet veahčira gihtii.
– Sávvat gieldalaččaid fárrui veahkehit doaibmasajiid huksemis sihke hutkat doaimmaid ja vejolaččat skeŋket čájáhusdávviriid Luossaguovddážii.
Ohcejoga gielda oaččui juovlamánus 125 000 euro Luossaguovddáža joatkaplánemii riikkabeivviid juovlaskeaŋkaruđain. Gielda áigu dainna ruđain kártet ja válljet guovddáža eaiggáduššanmálle. Dan lassin álget plánet ruhtadanmálle ja doaibmasajiid. Gielda guorahallá maid vejolaš giddodatfitnodaga vuođđudeami guovddáža várás.
Saváldahkan lea, ahte Luossaguovddáš beasašii álggahit doaimmas farggamusat.
– Galggašeimmet gávdnat ovttasbargoguimmiid, geat čatnasit luossaguovddáža bajásdoallamii nu, ahte go ráhkkanus lea ceaggut, de maiddái ruhtadeapmi livčče sihkkar, dadjá Kontio.
”Boares dávviriid livčče dehálaš rádjat”
Gielddas leat dál álggos plánen ordnet čájáhussaji boares skuvlaguovddáža ovtta luohkkálatnjii, mii lea girjerádjosa bálddas, ovdalgo ođđa Luossaguovddáš-viessu ceaggána. Dohko livčče jurdda čoaggit dávviriid mat laktasit luossabivdui ja ná álgit vehážiid mielde hukset doaimma Luossaguovddáža várás.
– Mii leat ožžon barggu jo binnáš álgui, ahte midjiide lea dál álgojagi boahtimin Eveliina Sarapää dáidda deike, muitala astoáiggečálli Kaisa Tapiola-Länsman.
Son jorahallá gieđaidis gaskkas boares lihtti, mas leat dolin sálten guliid. Dál goittot eai vel sáhte beare olu váldit dávviriid vuostá go ii leat sadji gos daid vurkkodit. Nuba ii gánnet vel gurret áittiid ja vuorkkáid iige eisige duššadit boares dávviriid.
– Olbmothan boarásnuvvet ja buohkat eai vealttekeahttá ádde boares dávviriid árvvu. Dehálaš livčče vurket ja rádjat daid dál ovdalgo dat duššet, dadjá Tapiola-Länsman.
Luossaguovddážii boađášii maid earret eará auditoria, gos sáhtášii ordnet konsearttaid ja vejolaččat gáiddusbarggu várás sajiid, muitala Päivi Kontio.
– Dáná sáhtášeimmet doalahit sámi kultuvrra ja maiddái oažžut ođđa doaimmaid.
Ohcejoga gielda oaččui jo jagis 2023 riikkaidbeivviid ruhtaváljagottis 150 000 euro Luossaguovddáža ovdačielggadanbargui.