Dán geasi leamašan garra báhkat ja danin maid johkačázit leat liegganan njuolga olahusloguide. Juo 18 gráđa lieggasut čázis luossaguolit gillágohtet. Erenomažit luossaveajehat gáibidit galbma čázi. Luondduriggodagaid guovddáža LUKE dutkanprofessor Jaakko Erkinaro muitala, ahte veajehat streassaluvvet liegga čázis.
– Dávddat áitigohtet ja dábálaš eallinnávccaid bajásdoallan šaddá váttisin. Dilli vearrána ain, go liekkasvuohta badjaná badjel 20 gráđa. Dalle stuorra luosatge gillágohtet.
Yle iđit-tv:s guolleáššedovdiguovttos leigga maid gieskat fuolas luossaguliid boahttevuođas. Mátta-Suomas dábálaš jávreguolit leat jámadan báhkaid dihte. 24 gráđas livččii maid luossa heakkaváras. Guolleáššedovdit ballaba liegganeami šaddat bissovažžan Suomas.
– Luosasohkii gullevaš guliin čuovžžas ja máivvis lea dál heahtedilli. Ain juo muhtin luossaguliid eallinbiras lea sirdašuvvamin davvelebbui, jáhkká Luondduriggodagaid guovddáža dutki Lauri Urho.
Ohcejoga siste guliin ii goit leat vel heahti. Ieš Deanus alimus liekkasvuohtan mihtiduvvui 21,8 gráđa suoidnemánu loahpas. Luossajámut eai goit leat vel beakkehan, muhto stuorra johka lieggana gulul.
Liegga čáhci doalvu guliin valjis energiija, seammás goit vuoigŋanáimmu mearri geahppána čázis, mii dagaha dili vel vearrábun. Veajehat ja stuorra luosat goit leat čeahpi geahččalit ceavzit ja gávdnat báikkiid, gos lea vehá galbmasut čáhci, muitalá dutkanprofessor Jaakko Erkinaro.
– Gáttiid lahkosiin sáhttet leat galbmagáldut ja smávva jogain ja ádjagiin golgá galbmasut čáhci. Veajehat nugo maid stuorát luosat máhttet ohcalit dohko. Gal Deanu sturrosaš čázádagas leat valjis dákkár báikkit, dadjá Erkinaro.
Geahča ášši otná Yle Ođđasiin diibmu 16.45 ja Ođđasiin maŋŋiteahkedis Yle tv1-kanálas.