Dán giđa Ohcejogas ordnejedje moattelogi jagi maŋŋá fas heargegilvvuid. Dál eai šat hálit, ahte gilvvuid gaska livčče máŋgalogi jagi.
Ordnejeaddjiid beales Kaisa Tapiola-Länsman muitala, ahte gilvvuid ordnema maŋŋá eai leat váiban baicce mokta livčče boahttevuođasge ordnet Ohcejogas heargegilvvuid.
– Ohcat ja geahččat mo de geavvá. Jus eat boahtte jahkái fitne gilvvuid, de sáhttá álgit smiehttat diená, ahte ordne juohke nuppi jagi. Doaivagiin mis lea goit joatkit ordnet heargegilvvuid Ohcejogas.
Dán jagi gilvvuide sii ožžo bures ruđalaš veahki ja maiddái olbmot ledje hui mielas bargat eaktodáhtolažžan gilvvuid ordnema ovdii. Ruđalaš dáhpagat eai báhcán, muitala Tapiola-Länsman.
– Báziimet plussa beallái áibbas bures. Mun lean investeren guokte Bajamaja-hivssega boahttevuođa várás. Bázii vel binná ruhta daid čuovvovaš gilvvuid várás, dadjá Tapiola-Länsman.
Boahtte jagi gilvvuid ferte cuoŋománus jo ohcat
Suomen porokilpailijat -searvi mearrida, gos guđege jagi besset ordnet virggálaš heargegilvvuid ja cup-oassegilvvuid. Searvvi ságadoalli Juha Harri muitala, ahte ohcamušaid ferte sáddet sidjiide ovdal cuoŋománu loahpa.
– Miessemánus čoahkkimastet ja gieđahallet ohcamušaid. Maŋimuštá čakčat lea dieđus gilvokaleandar, ahte gos gilvvut čuovvovaš dálvvi leat, dadjá Harri.
Jus háliida ordnet gilvvuid ja vel oažžut daid iežas báikegoddái, bálvalusat fertejit leat buori vai šaddet alla dási boazocup-gilvvut, dadjá Harri.
– Leat dieđusge dakkár báikegottit, mat ohcet jagis nubbái gilvvuid ja leat ordnen daid bures. dalle mii diehtit, ahte visot doaibmá bures, dego Ohcejogasge doaimmai dán jagi, loahpaha Harri.