Ohcejohkii leat máŋga jagi plánen sámi giellaguovddáža. Dan várás leat ollašuhttán ovdačielggadanfidnuid ja moadde jagi gielddas doaimmai maid Áilegasa giellasiida -prošeakta, mainna ovddidedje gieldda sámegielat bálvalusaid. Aitosaš giellaguovddáža eai goittot daid fidnuin nákcen ásahit.
Dál gielda lea bidjan johtui ođđa Deanuleagis sámástit -fidnu, man olis Ohcejohkii viimmat ceggejuvvo giellaguovddáš, mii galgá ovttasbargat rájáid rastá. Fidnu lea jođus gitta čakčamánu lohppii jahkái 2022.
– Dál ceggejuvvo giellaguovddáš, ja fidnu oktan bargun lea ordnet ruhtadeami ja sihkkarastit giellaguovddáža boahttevuođa fidnu maŋŋáge, muitala Ohcejoga ealáhus- ja ovddidanhoavda Eeva-Maarit Aikio.
Álggahit giellarávvehatdoaimma ja ráhkadit spealu
Deanuleagis sámástit -fidnu ulbmilin lea nannet sámegiela sajádaga Deanuleagis ja sápmelaččaid gaskavuođas. Go guovllus leat guhkes mátkkit, de ulbmilin lea hutkat čovdosiid, mo ovddidit sámegiela ja kultuvrra seailuma.
Ohcejoga giellaguovddáža ja Deanuleagi giellaguovddášfierpmádaga vuođđudeami lassin fidnu olis áigot ovddidit ja doarjut gáiddusoahpahusa, ođđa giellageavahanarenaid ja giellarávvehatdoaimma. Fidnus áigot ráhkadit maiddái speallobirrasa, mainna sáhttá oahppat sámegiela ja -kultuvrra.
Ovttasbargoguoibmin fidnus leat Kajaani ámmátallaskuvlla ja Norgga bealde Sámi Ealáhus- ja guorahallanguovddáš SEG.
Vuosttas doaimmat jo jođus
Áiddo dál fidnus leat fidnemin doaimmaid johtui, ja vuosttas doaimmat leat čujuhuvvon nuoraide.
– Koronadili dihte mii leat dál ovttasbarggus SEG:iin ráhkadan dakkár sámi doaibmabiŋgo, mas ulbmilin lea movttiidahttit mánáid, nuoraid ja dieđusge olles bearraša geavahit sámegiela, muitala Ohcejoga asttuáiggečálli Gáva-Ilmár Kaisa, Kaisa Tapiola-Länsman.
Sámi doaibmabiŋgoi leat čohkken iešguđetlágan doaimmaid, maid sáhttá čađahit sámegillii.
– Dasto go lea bargan juoidá dieid doaimmaid, de dasto sáhttá oassálastit vuorbádemiide. Mis leat hui buorit bálkkašumit vai mánáin livččii movtta oassálastit dan biŋgoi, muitala Tapiola Länsman.
Fidnui ohcet dieđiheaddji-buvttadeaddji
Deanuleagis sámástit -prošektii lea rekryterejuvvon projeaktahoavda, projeaktakoordináhtor ja máŋggagielatvuođaáššedovdi.
Prošeaktahoavdan álggaha čakčat Kati Eriksen ja prošeaktakoordináhtorin bargá Vilhelmiina Palosaari. Giellarávvehatdoaimma máŋggagielatvuođaáššedovdin álggaha čakčat Laura Arola.
Dál prošektii ohcet vel dieđiheaddji-buvttadeaddji áigodahkii 1.6.2020–31.7.2022. Ohcanáigi bargui nohká 15.5. Lassidieđut gávdnojit Ohcejoga gieldda neahttasiidduin.