Koronaepidemiija váikkuhii sakka Davvi-Suoma turismii. Giđđadálvve turismaindustriija bisánii go seaidnái, go epidemiija leavvagođii miehtá máilmmi.
Dan dihte máŋggat idjadanfitnodagat giddejedje uvssaidis, ja Yle Sámi smávva jearahallan čujuha, ahte buot báikkit eai oba áiggo rahpatge uvssaidis dán geasi.
Nuppit fas eai hohpohala rahpamiin, muhto jáhkket suopmelaččaid goit johttát, go golgan gullá dán beaivái. Nuba davás vurdojuvvojit olahusmearri suopmelaš turisttat ja ođđa olahuslogut ruovttueatnanturismma oasil.
Olgoriikkalaš turisttaid jávkan čuohcá sakka
Davvi-Suoma turismaindustriijas jorrá jahkásaččat issoras stuorra ruhta, miljovnnat ja miljovnnat eurot. Fitnodatdolliide goit lea dehálaš juohke áidna sente, go idjadanbáikkiid bajásdoallamis golut jorret, vaikko ii livčče oktage idjadeaddji.
Heahttálaš fitnodatdoalli Alpo Vuontisjärvi lohká áddet fitnodatdolliid biidnašuvvama dán dilis, go sisaboađut leat bisánan, muhto golut jorret. Iihan visttiid sáhte ollásit seavdnjadinge časkkit. Daid ferte goit ligget juoba.
– Váivves miella, go šaddá bargat ollu dakkára, mas boađus manná buollaša beallai. Iihan dát somá leat, muhto lihkus mis lea juo nu sajáiduvvan dát doaibma, ahte ruđalaš ceavzin lea buori vuođu alde, eaige nahkáriid manat dán dihte, dadjá Alpo Vuontisjärvi Heahtás.
Anárlaš hoteallaeaiggát Mari Lappalainen ii loga máhttit vel dadjat, man stuorra ráiggi olgoriikkalaš turisttaid jávkan lea dagahan.
– Olgoriikkalaččat leat dehálaš oassin guovllu turismmas, ja go sii leat jávkan, gal dat turismma dietnasiin dovdo. Man stuorra ráigi bursii šaddá, go buot joavkomátkkit leat šluhttejuvvon, báhcá oaidninláhkái ja dat, mo maid ráját rahppojuvvojit, dadjá Mari LappalainenAnáris.
Bohtetgo suopmelaččat maid davás
Olgoministeriijahan ain ávžžuha olbmuid luomustallat ruovtturiikkas koronavirusa dihte. Varas čilgehusa mielde sullii bealli suopmelaččain áiguge luomustallat gos nu Suomas, ja muhtimat áigot vel lasihit golgama. Dat veahkeha fitnodagaid ceavzimis.
Ounasloma-luopmogili eaiggát Alpo Vuontisjärvi Heahtás dadjá, ahte son ii nákcen čohkkát joavdelassan dušše belggiid jorahallamin, ja danin son lea juo rahpan iežas fitnodaga mátkkálaččaide Heahtás.
Son jáhkká geasi olmmošjohtui.
– Dál leat ollu gažaldatmearkkat, sihkkarit ii sáhte maidege dadjat. Suopmelaš mátkkálaččaid jáhkkit boahtit muhtin veardde, muhto olgoriikalaččaid mii eat várra oainne dáppe ovdalgo čakčageasi, dadjá Alpo Vuontisjärvi.
Anáris soames báikkit leat juo rabas, ja Wilderness Hotel Inari pláne rahpat uvssaidis mihcamáraide. Njellim hotealla áigot rahpat mihcamáraid maŋŋá.
Go ovdamearkan girdinjohtolat Avvilii álgá easkka borgemánus, Davvi-Suoma geainnuid alde sáhttá leat dán geasi mealgat biilajohtolat. Gohan beare bohtet, oaivvilda maid Mari Lappalainen.
– Olbmot goit háliidit mátkkoštit, gal sii gosa nu vulget ja dahket geasi guhkkodahkii máŋga mátkki. Njealje vahko luomu áigge geargá hurgit ja ammal Davvi-Supmiige soapmásat bohtet, lohká Mari Lappalainen Wildernes Hotel Inari- fitnodagas dán geasi vuordagiin.