Ođđa Sámediggi álggahii barggustis jagi álggus ortniiduvvančoahkkimiin, muhto dan maŋŋá eai leat čoahkkanan dievasčoahkkamii. Ođđa válgabaji nubbi dievasčoahkkin ordnejuvvo geassemánu 26. beaivve.
Sámedikki hálddahushoavda Pia Ruotsala-Kangasniemi muitala, ahte stivra lea mearridan ordnet čoahkkima gáiddusin koronavirusa dagahan spiehkastatdili dihte, vaikko dálá ráddjehusaid mielde 50 olbmo ožžot čoahkkanit seamma báikái.
Sámedikkis leat dál čielggadeamen mo lea buoremus ordnet stuorra čoahkkima.
– Tulkon ordnejuvvo dábálaččat, tulkkat leat dábálaš vuogi mielde fárus. Mii leat dán vahkus iskamin makkár prográmma bokte mii dan digitála čoahkkima čađahit. Spiehkastatdilis olbmot eai sáhte boahtit deike Sajosii, muhto sáhttet neahta bokte čuovvut dego ovdalge, lohká Ruotsala-Kangasniemi.
Maiddái Norgga beale Sámediggi ordne dievasčoahkkima gáiddusin duorastaga.
Sámediggi bargan gáiddusin olles giđa
Koronavirusa dagahan spiehkastatdilli lea váikkuhan maiddái Sámedikki bargamii. Eanáš oassi Sámedikki bargiin leat leamašan gáiddusbarggus.
– Vel dán geasi leat gáiddusbarggus, geahččat de borgemánus makkár lea dilli, muitala Pia Ruotsala-Kangasniemi.
Sámedikki ruoktobáiki sámekulturguovddáš Sajos lea rahppojuvvon fas gussiide. Ruotsala-Kangasniemi mielde sii čuvvot oppa áigge mo koronadilli Suomas ovdána.
– Mis lea plána, mo sáhttá galledit dáppe dorvvolaččat. Mii čuovvut Suoma eiseválddiid ávžžuhusaid, ahte mo bastit dorvvolaččat dikšut áššiid.