Sámedikki nuoraidráđđi lea ovttas ráđđehusbellodagaid nuoraiguin dieđihan odne, ahte sii dubmejit ruvkedoaimmaid sámiid ruovttuguovllus. Dieđáhusas sii muitalit earret eará das, ahte ruvkedoaimmain livčče bistevaš váikkuhusat sámiid árbevirolaš ealáhusaide ja kultuvrii.
Dieđáhusas čujuhit dasa, go gieskat málbmaohcanfitnodat Akkerman Finland Oy dagai guovlovárrema Eanodaga Jiehtáčerrui. Guovlovárrema dohkkehii dorvvolašvuođa- ja kemikáladoaimmahat Tukes.
Guovlovárren meidne dan, ahte fitnodagas lea vejolašvuohta bargat várrejuvvon guovllus dutkandoaimmaid ja dan maŋŋá ohcat vejolaččat málbmaohcanlobi.
Ráđđehusbellodagaid nuorat muittuhit, ahte sámeguovllu eallinfápmu ii buorrán, jus kultuvrras ja ealáhusas váldojuvvo vuođđu eret, dahje jus eará eanangeavahanvugiiguin dat deddojuvvo vulos.
Sámedikki Nuoraidráđđi lasiha, ahte sii leat fuolas guovllu nuoraid vuoigatvuođas hárjehit iežaset kultuvrra, dasgo lea vejolaš, ahte nuorat eai bastte joatkkit kultuvrraset ja ealáhusaideaset hárjeheami gilvaleaddji eanangeavahanhámiid dihte.
– Fuola dagaha maiddái dat, mot ruvkedoaimma lágan fitnuid dagahan eahpesihkkarvuohta boahttevuođa hárrái váikkuha sámenuoraid buresbirgejupmái, mielladearvvašvuhtii ja birgenláhkái, nuoraidráđis fuomášuhttet.
Dieđáhusa leat vuolláičállán Sámedikki nuoraidráđi ságadoalli Anni-Sofia Niittyvuopio, Demáranuoraid várreságadoalli Pinja Perholehto, Guovddášnuoraid ságadoalli Hanna Markkanen, Ruoná nuoraid ságadoallit Amanda Pasanen ja Brigita Krasniqi, Gurutnuoraid ságadoalli Liban Sheikh ja RÁB-nuoraid ságadoalli Frida Sigfrids.