Leammi álbmotmeahci guovllus ii oaččo šat roggat golli mášeniiguin geassemánu maŋŋá.
Ruvkelága čuovvu golledoidimii mieđihuvvon ruvkevuoigatvuođat fámohuvvet, go jagis 2011 álgán ovcci jagi sirdásanáigi nohká. Leammis leat dán rádjái sáhttán hárjehit mášengolleroggama dál fámohuvvi ruvkevuoigatvuođaid vuođul. Leammi álbmotmeahci guovllus mášengolleroggan goittotge nohká suoidnemánu 1. beaivvi rájes.
– Álbmotmeahci guvlui ii sáhte mieđihit golledoidinlobi mášenroggamii, dadjá Tukes bajit dárkkisteaddji Pasi Molkoselkä.
Dorvvolašvuođa- ja kemikáladoaimmahat Tukes mieđiha golledoidinlobiid Suomas.
Ruvkelága (621/2011) ákkastallamiin lea gávnnahuvvon, ahte mášengolleroggan ja dan dagahan vahátlaš birasváikkuhusat leat Leammi álbmotmeahci vuođđudandárkkuhusaid vuostá.
– Vahágat čuhcet eandalii rogganguovllu ja dan lagaš guovlluid eanavuđđui ja duovdagiidda, čáziide ja čázádagaide, guliide ja guollenáliide, boazodoallui ja eará ealáhusdoaimmaide maid guovllus hárjehit sihke virkkosmahttingeavahussii, čállá Tukes dieđáhusastis.
Sámedikki ságadoalli duđavaš mášenroggama nohkamii
Sámedikki ságadoalli Tuomas Aslak Juuso lea buriin mielain, go mášengolleroggama nohkan šaddá duohtan ja guovllu restaureren galgá maiddái álgit johtui. Mášengolleroggan lea barggahan Sámedikki máŋggaid jagiid.
– Dat lea dieđusge barggahan Sámedikki oalle olu, máŋggaid jagiid, logiid jagiid badjel. Dál dat áigi boahtá lohppii, ahte mášengolleroggan galgá nohkat.
Gollerokkit galget čorget mášengolleroggama luottaid ja doalvut rusttegiid ja mášeniid eret guovllus guovtti jagi siste. Lappi EBI-guovddáš čuovvu ášši, ja nu dahket maiddái Sámedikkis.
– Sámediggi čuovvu dánge ášši, nugo buot earáge lundui guoskevaš áššiid. Okta man fertet čuovvut, lea ahte dat luonddu máhcaheapmi dakkár álgodillái, nu guhkás go vejolaš, šaddá duohtan, dadjá Juuso.
Vaikko mášengolleroggan galgá nohkat, lea golleroggan goaivvuin goittotge ain vejolaš daidda geain lea golledoidinlohpi.
– Measta buohkat geat hárjehit golledoidima fámohuvvi vuoigatvuođa vuođul, leat ohcan ođđa golledoidinlobi ja jotket golledoidima goaivvuin roggamiin, muitala Pasi Molkoselkä.