Nuori Voima -kulturbláđđi bálkkašii njuorggánlaš govvejeaddji Lada Suomerinne. Suomerinne govat leat leamašan guktii Nuori Voima -bláđis. Su govat gieđahallet servodatlaš, ovttaskas sihke ekologalaš diliid čiekŋalit ja kreatiiva vugiin, čállá bláđđi.
Suomenrinne lea maid stuđeren govvema universitehtas Berliinas, Duiskkas.
Lada Suomenrinnei dát bálkkašupmi lea dehálaš máŋgga láhkai, go dat lea su vuosttas bálkkašupmi ja maiddái vuosttas geardi, go bláđđi addá bálkkašumi namalassii govvejeaddjái.
– Dat lea hui stuorra ášši munnje. Lea somá oaidnit ahte olbmot beroštišgohtet ain eambo govain, govain lea stuorra mearkkašupmi teavstta bálddas.
– Govvadáidda lea dakkár áibba iežas muitalanvuohki. Muhtumin lea álkit muitalit iežan muitalusaid govaid bokte, ja munnje lea álkit govvet go čállit, muitala Suomenrinne.
Suomenrinne lea háliidan gieđahallat govaidis bokte ovdamearkka dihte Sámi historjjá ja servvodaga. Dál čuovvovažžan son lea bargamin iešguđetlágan prošeavttaiguin, main okta gieđahallá feminismma.
Guldal Lada Suomenrinne govain eambo dás.
