Ođđ tåimmpââʹj vuõssmõs siidsåbbrin vaʹlljeet sääʹmsuåvtõõzzid Njauddâm da Njeäʹllem-Keväjääuʹr vuuʹdid pâjja 2021-2023.
Kuhttu suåvtõʹsse vaʹlljeet nellj vuäzzla da kueʹhtt väärrvuäzzla. Kuhttu siidsåbbrin vaʹlljeet še eeʹttiǩ Sääʹmkulttuurfoond halltõʹsse pâjja 2021-2024. Lââʹssen såbbrest ǩiõttʼtõõlât säʹmmlai tuõttvuõtt- da suåvâdvuõttkomissio aaʹššid di jeeʹres ääiʹjpoddsaž aaʹššid.
Njauddâm vuuʹd saaʹmi siidsåbbar ââʹnet sueʹvet 20.2.2021 ääʹljeeʹl čiâss 15.00 Čeʹvetjääuʹr škooulâst. Njeäʹllem-Keväjääuʹr vuuʹd saaʹmi siidsåbbar ââʹnet pâʹsspeeiʹv 21.2.2021 ääʹljeeʹl čiâss 13.00 Njeäʹllem sieʹbrrpõõrtâst.
Såbbri jäʹrjstummšest vääʹldet lokku koronaviruuzz pâššnummuž cõggmõõžž. Såbbrin jääʹǩǩtet Tiõrvâsvuõđ da pueʹrrvââjjam stroiʹttel da mättʼtõs- da kulttuurministeria uʹvddem vuäʹppõõzz staankõõskin da hygieniavuõʹjjin.