Säämi máttááttâskuávdáá nuorttâlâškielâ- já kulttuurlinje taarbâš lase occeid, čaalij Lapin kansa jieht. Neeljis láá uuccâm luuhâđ nuorttâlâškielâ- já kulttuur. Puoh sämikielâlinjáid majemuš virgálâš uuccâmpeivi lii onne, vástuppeeivi.
Anarâškielâ- já kulttuur linje-uv taarbâš lase occeid, muštâl Säämi máttááttâskuávdáá anarâškielâ- já kulttuur máttáátteijee Iiris Mäenpää.
– Koskoho occeeh lijjii käävci já algâttemsajeh láá 12, te oroččij et ucâmušah uážuččii puáttiđ vala eenâb-uv.
Jis occeeh iä lah tuárvi, te láá kyehti máhđulâšvuođâ: jo-uv juátkiđ uuccâmääigi, teikkâ talle smiettâđ hybridimaali škovliittâsân, čielgee Mäenpää. Hybridimalli meerhâš tom, et uási máttááttâsâst ličij aldamáttááttâssân já uási káidusin.
Mäenpää: "Ennuv ennuv hitrub lii porgâđ, ko láá váhá eenâb uáppeeh"
Sun kuittâg arvâl, et kale käävci-uv tohhee, mut ličij pyeri jis šodâččij tievâ juávkku. Tot vaaigut maaŋgâ áášán.
– Puoh keevâtliih sárnumhárjuttâsah já sierah já tágáreh tábáhtusah, moheh, reeisuh, te ennuv ennuv hitrub lii porgâđ, ko láá váhá eenâb uáppeeh. Puáhtá molsođ paarâ já hárjuttâllâđ tom kielâ eres ulmuigijn.
– Tiäđust-uv tot-uv, et sämikiellinjáid puátih táválávt maaŋgâlágáneh ulmuuh. Jis láá eenâb uáppeeh, te juáháš kávná kuittâg kiännii kiäin lii hitruu viettiđ tom oles ive, hundâruš Mäenpää.
Mäenpää ij haalijd val tađe tärkkilubboht miäruštâllâđ, maggaar häämist puáttee ive máttááttâs olášuvá. Ulmen ličij kuittâg orniđ aldamáttááttâs, nuuvt et máttááttâs tábáhtuvá njunáluvâi. Koronatile já tot jis uáppeeh iä lah tuárvi, pyehtih kuittâg mutteđ tile.
– Tijmá-uv keevâi nuuvt, et motomeh valdii ucâmušâid meddâl mottoom kooskâst. Ainhân ulmui elimist puátih oovdân tágáreh ääših, et ij pyevtigin puáttiđ, Mäenpää iätá.
Uuccâmluámáttuv já lasetiäđuid kaavnah tääbbin.
Kuldâl lase anarâš saavâid tääbbin.