Korona leavvá fas Sámis. Eanodagas leamaš guokte koronanjoammuma maŋimuš áiggiid ja Norgga bealdeges koronanjoammumat leat maŋimuš áiggiid lassánan sakka Davvi-Norggas, ovdamearkan Guovdageainnus leamaš maŋimuš beivviid áigge njeallje koronanjoammuma, muitala Ávvir-aviisa.
Eanodaga njunušdoavttir Teemu Taulavuori dadjá leat fuolas Norgga dilis. Lappi buohccedikšunbiire lea ságastallan áššis rádjegohcinlágádusain.
– Velhan ii leat stáhtaráđi ásahus, mii attášii vejolašvuođa dárkkistit duođaštusaid sis, geat leat leamaš kránnjágielddain 14 jándora Norgga bealde. Mii leat jurddašan, ahte dilli buorrána jo dainna, ahte juohkit dieđu dilis ja jearrat earáge rádjerasttildeaddjiin duođaštusaid, dadjá Taulavuori.
Anára njunušdoavttir Outi Liisanantti muitala, ahte Anárisge ledje moadde vahku dassá muhtin koronanjoammumat ja juohke vahkus muhtin anárlaš šaddá koronanjoammuma áitaga vuollái. Liisanantti hálidage ávžžuhit olbmuid váldit koronaboahkuhusaid, go orru ahte koronadilli lea fas jorggiheamen fuonit guvlui.
Koronanjoammumiid lassáneapmi davvin lea lasihan bargonoađi Lappi guovddášbuohcceviesus Roavvenjárggas, muitala Lapin Kansa-aviisa. Buohcceviessodikšui leat šaddan oktiibuot 4 koronabuohcci. Sii leat vuollel 40-jahkásaš olbmot, geat eai leat váldán boahkuhusa sihke badjel 70-jahkásaš guktii boahkuhuvvon olbmot, geain lea muhtin vuođđobuozalmasvuohta.
Beaivvi ságaid ja Yle Ođđasiid Sámis sáhtát maid guldalit Yle Areenas.