Eanariekti almmuhii bearjadaga duomus Deanu čázádaga Veahčak laiggusgotti lotnundoaimmahusas. Eanarievtti mielas bivdorivttiid manaheamis sáhttá mearridit buhtadusa jagiid 1972, 1979, 1982 ja 1989 Deanu bivdonjuolggadusain mearriduvvon bivdoráddjehusaid geažil.
Buhtadus máksojuvvo dihto indeaksa vuođul, nu ahte dat vástida dan árvvu mii lea lotnunmearrádusa addima áigge jagis 2017. Buhtadussii ii gula máksit reanttu.
Eanariekti gárttai geassit rájá dasa, makkár bivdoráddjehusain buhtadus máksojuvvo ja man sturrosaš vahát buhtaduvvo. Bivdovuoigatvuođalaččat gáibidedje váidagiin maiddái buhtadusa riektegieđahallama ádjáneamis. Dasa eanariekti oasil mieđai.
Mearrádus mearkkaša maiddái, ahte laiggusgotti oasálaččat eai gártta vástidit stáhta riektegeavvangoluin oktasaččat, olles 140 000 euro, nu mo stáhta ovddasteaddjit leat gáibidan. Iežaset riektegoluid bivdovuoigatvuođalaččat gártet máksit, muhto dat lea mealgat unnit, badjelaš 20 000 euro.
Bivdonjuolggadusaid dagahan vahágiidda sápmelaččaid kultuvrii eanariekti ii váldán beali.
Duomustis eanariekti celkkii earret earáid, ahte muhtin guoddaleaddjiid gáibádus sápmelaš kultuvrralaš vahága buhtadeamis livččii vejolaš ollašuhttit dušše, juos sii livčče bastán čájehit duohtan ekonomalaš manaheami. Dan gáibádusa eanariekti hilggui, muhto celkkii seammás, ahte dat ii eastte gáibádusa gieđahallama mannu eará doaibmaválddálaš duopmostuolus.
Go áššit ádjánedje eanarievttis de dange ovddas stáhtta gártá máksit
Váidagiin lei gažaldat Deanu guolástansoahpamuša ja guolástannjuolggadusa muhtun mearrádusaid dagahan massimiid buhtadeamis addojuvvon lága vuođul čađahuvvon buhtadusdoaimmahusas. Suoma parlameanta ásahii buhtaduslága jagis 1991. Eanamihtidanlágádus gearggai guhkálaš doaimmahusain jagis 2017.
Eanariekti álggahii ášši njeallje jagi dassá, skábmamánus 2017. Koronapandemiija maŋidii váldogieđahallama sullii beannot jagiin.
Eanariekti čoahkkanii Ohcejotnjálmmis 23.9. ja 24.9. gieđahallat Veahčaka laiggusgotti osolaččaid váidagiid ja stáhta buhtadusgeatnegasvuođa ja gulai dalle vihtaniid.
Ášši gieđahallan eanarievttis guoskkai lagabui 200 olbmui. Olles duopmočállosa guhkkodat lea 60 siiddu. Jus lea duhtameahttun eanarievtti dupmui de váidinlobi galgá ohcat alimus rievttis 60 jándora siste.
Eanariekti gullá oassin gearretriektái, ja eanariekti gieđahallá giddodatdoaimmahusain dahkkojuvvon váidagiid ja guoddalusaid.
Yle Ođđasiid Sámis ja Beaivvi ságaid sáhtát maid guldalit Yle Areenas.