Ođđasamos dieđut koronavirusis: Badjel 80-jahkásaččaide addigohtet njealját koronaboahkuhusaid Anáris | Seaŋgaossodaga galledangielddus Avvilis joatkašuvvá

Badjel 80-jahkásaččaide addigohtet njealját koronaboahkuhusaid Anáris

Badjel 80-jahkásaččaide addigohtet njealját koronaboahkuhusaid dán vahku rájes Anár gielddas.

Sihke Anára dearvvašvuođadivššára vuostáiváldin báikkis Sajosis go maiddái Avvila dearvvašvuođaguovddáža rávvehagas oažžu koronaboahkuhusaid áiggi várrema haga dán bearjadaga diibmu 12-14.

Dilálašvuođain addet maiddái vuosttas, nuppi dahje goalmmát boahkuhusaid dáidda, geat daid dárbbašit.

Dárkilut boahkuhanáiggiid gávdná Anára gieldda neahttasiidduin.

Dearvvašvuođa- ja buresbirgenlágádus THL ávžžuha badjel 80-jahkásaččaid váldit dál njealját boahkuhusa.

Seaŋgaossodaga galledangielddus Avvilis joatkašuvvá

Avvila dearvvasvuođaguovddáža seaŋgaossodaga galledangielddus joatkašuvvá. Galledangielddus lea fámus cuoŋománu logát beaivve rádjai. Liikká mieđustan- dahje ráhkkanahttindivššu buohcciid lagamuččat sáhttet galledit, go beare čuvvot njuolggadusaid, nappo dollet dorvogaskkaid, geavahit máskka ja fuolahit gieđaid buhtisindoallamis.

Lappi AVI ávžžuha ain geavahit máska almmolaš sissajiin

Koronadilli lea Lappi guovllus ain hui váttis.

Lappi guovlohálddahusdoaimmahat leage mearridan dál joatkkit cuoŋománu lohppii mearrádusa sissajiid dearvvašvuođadorvvolaš geavaheamis.

Mearrádus oaivvilda dan, ahte almmolaš sissajiin ávžžuhit ain geavahit máska, beavttálmahttit áibmomolsuma ja ráddjet áššehasmeriid. Doaimmaiguin geahččalit eastadit koronanjoammumiid.

Mearrádus ii guoska oahppalágádusaide, árrabájasgeassimii, ámmátvaláštallamii dahje bearaš ja priváhta eallima doaimmaide.

Galledangielddus Avvila dearvvasvuođaguovddáža seaŋgaossodagas

Avvila dearvvasvuođaguovddáža njunušdoavttir Outi Liisanantti almmuha dieđáhusas, ahte dearvvasvuođaguovddáš seaŋgaossodagas lea galledangielddus 23.3.–3.4.2022.

Oapmahaččat ožžot liikká ain galledit mieđuštandivššu divššohasaid, muhto galledemiin ferte muitit gieđaid buhtisindoallama, dorvogaskkaid ja geavahit máskka.

THL ávžžuha njealját koronaboahkuhusa badjel 80-jahkásaččaide ja boarrásiidruovttuid ássiide

Dearvvašvuođa- ja buresbirgejumilágádus THL ávžžuha njealját koronaboahkuhusa badjel 80-jahkásaččaide ja olbmuide, geat orrot boarrásiidruovttuin. Árvalusaid mielde dákkár olbmot leat Suomas birrasiid 300 000.

Njealját boahkuhusa lea vejolaš addit áramustá golbma mánu dan maŋŋá, go lea ožžon goalmmát boahkuhusa dahje buohcan koronadávdda.

THL jođiheaddji áššedovdi Mia Kontio dadjá, ahte njealját boahkuhusa ávžžuhit dál boarrásiidda jođánepmosit danin, go boahkuhusat eai atte nu buori suoji vuorraset olbmuide váttis dávdda vuostá go nuorabuidda.

Gielddat almmuhit sierra, ahte gos ja goas njealját boahkuhusaid lea vejolaš oažžut.

THL ráhkkana addit ávžžuhusa njealját boahkuhusas

Dearvvašvuođa-ja buresbirgejumilágádus THL lea ráhkkaneame addit ávžžuhusa 4. boahkuhusa addimis koronavirusa vuostá. Korona lea maŋemuš áiggiid sakka fas leavvanišgoahtán ja njommon maiddái gitta davimus Sámis.

Dán rádjai njealját boahkusa addima leat ávžžuhan dušše sidjiide, geain dávddaid vuostálastinnákca lea fuonit go dearvvas olbmuin.

Mannan áiggiin buohcceviessodivššus leamašan eambo olbmot go epidemiija álgima rájes ja dat lea oktan ággan lassiboahkuhusaid addimii. Maiddái omikron-virusa BA.2- variánta leavvá jođánit.

Anáris guovtti vahku siste 149 ođđa koronavirusnjoammuma, Ohcejogas 63

Dearvvášvuođa- ja buresveadjima lágádusa loguid mielde Anáris lea vássán guovtti vahku áigge ilbmán 149 ođđa duođaštuvvon koronavirusnjoammuma. Ohcejogasges ođđa duođaštuvvon dáhpáhusat leat guovtti vahku áigodagas 63. Seamma áigodagas Soađegilis leat duođaštan koronavirusa 33 olbmos ja Eanodagas guovtti olbmos.

Raporterejuvvon koronanjoammumiid mearri ii goittot čájet šat duođalaš njoammunmeari, dasgo buohkat buohccán olbmot eai šat testejuvvo.

Anára gieldda jođiheaddji doavttir Outi Liisanantti muitala dieđáhusastis, ahte osodatdivššus leat koronabuohccit ja dávdii leat buohccán maiddái máŋggat buohcceviesu bargit.

Dán vahkus Suomas leat duođaštan vádjit 11 400 ođđa koronavirusnjoammuma.

Lappi guovddášbuohcciviesus olahus mearri koronabuohccit

Koronavirus njoammu ain aktiivvalaččat birra Suoma ja njoammumat leat lassánan maŋemuš vahkkuid áigge sakka. Alla njoammunlogut dovdojit maiddái buohcciviesuin.

Lappi guovddášbuohcciviesus Roavenjárggas ledje ikte maŋŋebárgga divššus 19 koronabuohcci, mii lea stuorimus lohku olles koronapandemiija áiggis. Dasa lassin koronabuohccit leat divššus maiddái dearvvašvuođaguovddážiin.

Länsi-Pohja buohccidikšunbiire infekšuvdnadoavttir Markku Broas árvala, ahte Omikron-variántta geažil njoammunlogut bissot badjin Lappis ain guhkás giđđii.

Suoma riikiiboahtinráddjehusaid jotket 10.4. rádjai

Olgoministeriija dieđáhusas muitaluvvo, ahte stáhtaráđi mearrádusa mielde Suoma riikiiboahtima ráddjehusaid jotket cuoŋománu 10. beaivvi rádjai. Ievttá rájes EU- ja Schengenguovllu olggobealde boahtti dámppaid mátkkošteaddjit ožžot fitnat riikkas, jus sis lea duođaštus koronaboahkuin dahje sii leat buohcan korona vuollel 6 mánotbaji dassái.

Ohcejoga gielddas ollu koronavirusnjoammumat

Ohcejoga gieldda dieđáhusa mielde gielddas leat dál ollu koronavirusnjoammumat. Vaikko dearvvasvuođafuolahus ii šat eanaš dáhpáhusain teste koronavirusa, de dihtet, ahte dávda leavvá dál gielddas.

Dearvvasvuođafuolahusa dilli lea liikká ráfálaš, eaige ovdan leat boahtán váigadis dávdadáhpáhusat. Dearvvasvuođafuolahus muittuha ain máskkaid geavaheami, gieđaid buhtisindoallama ja dorvogaskkaid mearkkašumis njoammumiid eastadeamis.