Dál guovvamánu 1. beaivvi rájes bargoaddis lea riekti jearrat riskajoavkkuin bargi olbmuiguin sin boahkuhandieđuid. Divššárat, geat barget riskajoavkkuiguin, galget leat váldán koronaboahku dahje de sidjiide galgá fállat eará barggu. Jus eará bargu ii leat fidnemis, de bálkkámáksin sáhttá bissehuvvot, muhto ii leat gal lohpi eretcealkit daid bargiid.
Spiehkastat leat sii, geat eai dálkkasdieđalaš siva dihte sáhte váldit boahkku. Sii sáhttet bargat riskajoavkkuiguin, muhto galget čájehit varas negatiiva koronateasttabohtosa.
Ohcejoga gieldda dikšunbarggu hoavda Päivi Kontio muitala, ahte unna gielddas dego Ohcejogas lea váddásut gávdnat eará bargguid daid divššáriidda, geat eai hálit iežaset boahkuhandieđuid addit bargoaddái.
– Mii leat dál ođđajagimánus kárten dili ja dasto suokkardallan bargiiguin, ahte háliiditgo sii joatkit dálá barggus vai vejolaččat sirdašuvvat eará bargguide. Galhan dás sihkkarit dilli šaddá dakkárin, ahte eanet vulget bargit eret go bohtet, árvala Kontio.
Kontio muitala, ahte dál sii birgejit vel, muhto vejolaččat gártet vel dan dillái, ahte sirdet bargiid eará bargguide. Son muittuha, ahte dás ii leat sáhka dušše das, ahte sirddašit bargiid, muhto maiddái das, ahte beaivválaččat olbmot leat eret barggus ja sin sadjái galggašii gávdnat bargiid.
Eanodaga jođiheaddjidoavttir Teemu Taulavuori muitala, ahte gielddas leat dušše ovttaskas dáhpáhusat leamaš. Oktage ii goittot leat bálkkáhis luomus boahkugeatnegasvuođa dihte.
Rabasdivššu hoavda Mirja Laiti mielde Anáris leat moattis boarrásiiddivššu bealde, geat sirdašuvvet dán dilis eará bargguide.
Yle Sápmi ii fitnašuvvan oažžut Soađegili gielddas dieđuid dán áššis.
Beaivvi ságaid ja Yle Ođđasiid Sámis sáhtát maid guldalit Yle Areenas.