Njuorggáma ođđa skuvla-máŋggadoaimmadállu lea máŋggaid mohkiid maŋŋá viimmatge válmmaš. Seamma dálus leat skuvla, beaivveruoktu, dearvvašvuođadivššár ja kuráhtor. Ođđa skuvla illudahttá sihke oahpaheddjiid ja ohppiid.
Skuvllalaš Anni-Siviä Länsman beasai dán vahku maŋŋebárgga oahpahallat vuosttaš háve dieđuid ja dáidduid dán ođđa skuvllas.
– Hui speanta ja somá. Dáppe ledje nu stuorra báikkit ja buot luohkáide boahtá iežas suffá, nu dat lea hui somá.
Länsman mielas giellalávgunluohkká lea buot fiidnásamos luohkká, go doppe leat čáppa ivnnit ja olu čuovga.
Njuorggáma skuvlla veahkejođiheaddji ja sámeluohká oahpaheaddji Sisko Länsman muitala, ahte guovvamánnu lea sidjiide ávvumánnu, go besse viimmatge fárret ođđa skuvlii.
– Dán leat vuordán guhká, dan ii sáhte sániiguin govvet. Oahppit lohket seamma, ahte dat lea hui suohtas.
Länsman illuda ođđa skuvllas earenoamážit das, ahte sii leat oažžumen visot ođđa biergasiid skuvlii ja skuvla lea máŋggadoaimmadállu.
– Mii leat seamma sajiin sihke árrabajásgeassin, skuvlla dearvvašvuođadivššár, kuráhtor, earenoamáš oahpaheaddjit. Dáppe ii dárbbaš šat vuolgit eará go lihkadandiimmuide eará sadjái.
Länsman oaidná ahte ođđa skuvla-máŋggadoaimmadálus lea mearkkašupmi maid dan dáfus, man olu unna giláš geasuha olbmuid.
– Dál olbmuin sáhttá leat buoret hállu fárret deike, go dáppe lea dearvvas skuvla- ja árrabajásgeassinlanjat, árvala Sisko Länsman.
Beaivvi ságaid ja Yle Ođđasiid Sámis sáhtát maid guldalit Yle Areenas.