Sápmelaččaid duohtavuođa- ja soabadankommišuvnna bargu čievččastuvvo johtui albmaláhkái odne maŋŋebárgga álggahanseminárain.
Álggahanseminára lea rabas buohkaide ja dan sáhttá čuovvut neahtas Zoom-oktavuođa bokte diibmu 12–16.
Duohtavuođa- ja soabadankommišuvnna álggahansemináras lea vejolaš gullat riikkaidgaskasaš vásáhusaid duohtavuođa- ja soabadanproseassain ja ovdan bohtet maiddái eamiálbmogiidda ja duohtavuođa- ja soabadanproseassaide vudjon áššedovdiid jurdagat.
Sáhkavuoruid doallaba earret eará Norgga duohtavuođakommišuvnna ságadoalli Dagfinn Høybråten ja Kanada soabadan- ja duohtavuođaguovddáža čuovvunjoavkku jođiheaddji Cynthia Wesley-Esquimaux. Maiddái dutki Veli-Pekka Lehtola, sierraáššedovdi Antti Pentikäinen, nákkosgirjedutki Helga West ja sosiálaráđđi Ristenrauna Magga buktet ovdan iežaset oainnuid kommišuvnna bargui.
Sáhkavuoruid maŋŋá lea várrejuvvon áigi jearaldagaide ja ságastallamii.
Dilálašvuođa rahpet vuoigatvuođaministtar Anna-Maja Henriksson, Sámedikki sátnejođiheaddji Tuomas Aslak Juuso ja Nuortalaččaid ovdaolmmoš Veikko Feodoroff. Dilálašvuođa láidesteaddjin doaibmá Sápmelaččaid duohtavuođa- ja soabadallankommišuvnna váldočálli Anni-Kristiina Juuso.
Semináras lea dulkon sámegielaide, suoma- ja eŋgelasgillii. Dárkilut prográmma gávnnat dáppe.
Beaivvi ságaid ja Yle Ođđasiid Sámis sáhtát maid guldalit Yle Areenas.
Divvojuvvon 8.2. dii. 8.53 Cynthia Wesley-Esquimaux tihttel.