Davvin táŋkejit Suoma divrasamos boaldámušaid. Ohcejogas sihke dieselis ja bensiinnas leat galgan máksit badjel guovtti euro lihtterhatti.
Polttoaine.net-siiddu mielde diesela haddi Njuorggámis lei vuossárgga 2,07 euro lihtteris. 95-oktána bensiidna fas mávssii vuossárgga 2,15 euro lihtteris ja 98-oktána bensiidna 2,22 euro lihtteris.
Eanodaga Heahtásges diesel lei maŋŋebárgga juo measta guokte euro, go dárkilis haddi lei dalle 1,999 euro. Bensiinnat mákse lihtteris 2,039 ja 2,079 euro.
Gárasavvonlaš Rosamaria Mattila táŋkii biillas maŋŋebárgga Heahtás ja muitalii, ahte son lea luohpan buot dušši vuodjinmátkkiin, son dikšu baicce máŋga ášši seamma reaissus. Gárasavvonis Heahttái lea sullii 60 kilomehtera mátki.
– Ovdal soiten beare somá dihte čohkkát biillas, muhto in gal šat, son dadjá.
Bággu táŋket vai bissu láibbis gitta
Ohcejohkalaš fitnodatdoalli Kari Guttorm lohká ahte bivastat álgá leaikut, go táŋke linnjábiilla dahje guorbmebiilla 400 lihttera táŋkka.
– Illá duostá šat vuolgit oba táŋket, muhto bágguhan dat lea vuodjit vai bissu veahá láibbis gitta, son bosiha.
Loktanan hattit leat njuolga eret fitnodatdoalli dietnasis, eaige vejolašvuođat leat. Dál eai vel stuorát biillaide gávdno elmohtorat, eaige dat njuolga buollašiin livčče oba nu luohtehahtti, árvala Guttorm.
– Ii leat molssaeaktu. Mun lean smiehtan, mii dat livčče, muhto dasa ii gávdno molssaeaktu, árvala Guttorm.
Norgga bealde Guttorm fitná duollet dálle táŋkemin, ja das vuoitá moaddelot sentte lihtteris. Stuorra biillain dat mearri leage dasto juo olu, go galgá olu táŋket.
Oljju haddi ain allin
Boaldámušhattit lea vássán áiggiid leamašan allin olles riikkas. Duogážis lea earenoamážit oljju haddi.
Davvin diesela lea lagaš beivviid áigge ožžon hálbbimusat 1,8 euroin, muhto eanemus osiin haddi leamaš vel sullii vihtta sentte divraset. 95-oktána bensiinnas lea Polttoaine.net -siiddu mielde galgan máksit measta juohke sajis unnimustá 1,90 euro.
Vuollel guovtti euro hattiin 98-oktána bensiinna lea Lappi guovllus ožžon dušše moatti bensenstašuvnnas.
Beaivvi ságaid ja Yle Ođđasiid Sámis sáhtát maid guldalit Yle Areenas.